Rueda insta os seus rivais políticos a aclarar posibles pactos antes da cita coas urnas e ratifica que o programa se presentará en abril
SANTIAGO DE COMPOSTELA, 31 Mar. (EUROPA PRESS) -
O secretario xeral do PPdeG, Alfonso Rueda, ratificou que os populares presentarán candidato para as eleccións municipais de maio nos 314 concellos galegos, dos que só 45 --o 14,3 por cento-- son mulleres, aínda que a porcentaxe se eleva dende o 12 por cento dos comicios de 2011. Do total de aspirantes, a renovación rolda o 25 por cento.
Tras presidir o Comité de Campaña, Rueda resaltou que o PPdeG se presenta en todos os municipios da comunidade, fronte aos "problemas" rexistrados por outras formacións políticas. O "retrato tipo" do cabeza de cartel popular "rolda os 50 anos e a súa profesión é liberal ou traballa por conta propia".
No seu conxunto, un de cada catro candidatos --un 25 por cento-- son novos, mentres que se a porcentaxe se cingue aos municipios nos que o PP non goberna a renovación ascende o 55 por cento.
Nas cidades, o PPdeG optou por manter os alcaldes da Coruña, Carlos Negreira, e Ferrol, José Manuel Rey Varela. Tamén repetirá o voceiro local lucense e deputado, Jaime Castiñeira, o candidato urbano "máis apoiado" nos pasados comicios. Renova en Santiago, con Agustín Hernández, Ourense, con Jesús Vázquez, Vigo, con Elena Muño, e Pontevedra, con Jacobo Moreira.
En canto á porcentaxe de mulleres, Rueda admitiu que a presenza feminina no listado de cabezas de cartel (45) é "baixa", pero tamén destacou que hai "un avance" fronte a 2011, xa que se pasa dun 12 ao 16 por cento.
Sobre as candidaturas completas cos membros que acompañarán aos cabezas de lista, o número dous do PPdeG non deu un prazo pechado. Sinalou que se concretarán "no seu momento", se ben algunhas xa están pechadas.
PROGRAMA ELECTORAL E COMITÉ DE DIRECCIÓN
En canto ao programa electoral, unha vez presentado o estatal, Rueda esgrimiu que "toca agora" presentar o galego, que está sendo elaborado por un equipo que coordina o voceiro parlamentario dos populares, Pedro Puy, e que será presentado en abril.
A próxima semana os populares trazarán as liñas mestras dos próximos 50 días nun Comité de Dirección, se ben o Comité de Campaña xa empezou a perfilar esta cuestión este martes.
A semana que vén terán lugar tamén as presentacións que estaban pendentes de Agustín Hernández e Elena Muñoz. O martes será a do candidato de Santiago, e o venres o da cabeza de cartel de Vigo. En ambos os dous actos participará o xefe de filas do PPdeG, Alberto Núñez Feijóo.
NOVOS PARTIDOS E PACTOS
Rueda admitiu que as "circunstancias" non son "as mesmas" que en 2011 coa presenza de novos partidos e plataformas, pero recordou que na anterior cita coas urnas foron "moitos" os galegos que confiaron no PPdeG, polo que se traballará na liña de "explicar o que se fixo" e intentar "recuperar a confianza".
"Quen a estas alturas crea que hai fórmulas máxicas ou algo que non sexa explicar que se fixo e que se vai facer na nosa opinión estase a equivocar. Se alguén saca algún coello da chistera xa verémolo. Nós niso somos bastante previsibles: estabilidade, balance de goberno e querer seguir sendo un partido de goberno", resolveu.
Por outra banda, preguntado pola postura de Podemos en Andalucía e os pactos de goberno que se poderían dar en Galicia, deu por feito que os cidadáns "agradecerían saber" que pensan facer "os que están a pedir o voto da xente". "Non vale de nada dicir non o sei, xa o direi despois", advertiu.
"LISTA MÁIS VOTADA"
De feito, sinalou que "o lóxico" é que explicitar eses acordos agora que falta "tan pouco tempo" para a cita coas urnas.
"Sería unha boa pregunta para facer a todos os que saben que o seu único modo de gobernar é pactar con outros partidos. O PPdeG dixo sempre que aspira ás maiorías suficientes para gobernar e que non o quere facer se a xente non nos dá a maioría, e a maioría é ser a lista máis votada", resolveu.
