CALDAS (PONTEVEDRA), 1 Ago. (EUROPA PRESS) -
A xuíza decretou prisión provisional comunicada e sen fianza para David O.R., o presunto parricida que este venres supostamente asasinou ás súas dúas fillas de 4 e 9 anos de idade en Moraña (Pontevedra).
A responsable do xulgado mixto número 1 de Caldas adoptou esta decisión, na liña coa medida solicitada polo fiscal do caso. Ao detido impútanselle dous delitos de asasinato e foi conducido á prisión da Lama.
O presunto parricida de Moraña acolleuse ao seu dereito a non declarar nos xulgados de Caldas, onde decenas de persoas o volveron increpar á súa saída, ao berro de "asasino" e onde axentes da Garda Civil mesmo tiveron que conter o tumulto.
Malia estar catro horas no interior do xulgado, o home rexeitou declarar ante a xuíza, pero a súa estanza en dependencias xudiciais prolongouse porque solicitou unha audiencia reservada co seu avogado.
David O.R. pasou a noite na Comandancia de Pontevedra tras recibir a alta no Hospital Montecelo, onde foi atendido das feridas que se autoinflixiu, despois de supostamente matar as súas dúas fillas.
O home foi conducido este mediodía aos xulgados de Caldas en torno ás 12.30 horas e foise nun furgón da Garda Civil sobre as 16.45 horas.
