Os populares apelan á titularidade municipal do mercado ferrolano de Caranza para rexeitar unha iniciativa do PSdeG que pedía melloras
SANTIAGO DE COMPOSTELA, 15 Abr. (EUROPA PRESS) -
O proxecto de construción dun centro comercial e de ocio na parroquia viguesa de Cabral aínda "non consta nin existe nos arquivos da Dirección Xeral de Comercio, segundo asegurou este martes o seu titular, Sol Vázquez, na comisión de industria da Cámara galega a preguntas da deputada de AGE Consuelo Martínez.
Martínez subliñou en sede parlamentaria que a cidade olívica ten "sitios de ocio e comercios de sobra", fronte ao que advertiu de que "o problema" que afronta é o do comercio local, que se perde". Neste escenario, acusou á Xunta de "estar a apostar porque desapareza". "E o Concello de Vigo --opinou--, tamén".
Fronte a estas críticas, a responsable de comercio, alto cargo da Consellería de Economía e Industria, referiuse á lei de comercio e ao decreto que regula a implantación de grandes superficies para aseverar que "o certo é" que a Administración autonómica ten que "respectar a legalidade".
Así, a directora xeral de Comercio garantiu que o seu departamento esixirá aos promotores deste centro comercial que, cando entreguen a documentación requirida, esta cumpra todos os requisitos e os criterios "máis rigorosos posibles" nos apartados de viabilidade económica, ambiental, de mobilidade e social.
"NIN PARA ADIANTE NIN PARA ATRÁS"
Ademais, enumerou os informes que "se van pedir", de "adecuación" aos instrumentos de ordenación do territorio, sobre o estudio integral de mobilidade e da casa do concello. Este último, segundo destacou, "vai ter unha importancia vital á hora do posible resultado".
Así as cousas, concluíu coa idea de que o Goberno "non pode nin dar para adiante nin para atrás" un proxecto que, no seu caso, "o que vai é a tramitar con obxectividade", pero que "polo momento", segundo dixo, "non consta nin existe nos arquivos da Dirección Xeral".
MERCADO DE CARANZA EN FERROL
Por outra banda, na mesma comisión, no apartado de iniciativas, foi rexeitada a única presentada, relativa ao mercado de Caranza, en Ferrol, coa que o PSdeG, a través da súa deputada Beatriz Sestayo e co apoio do resto de grupos da oposición --AGE e BNG--, pretendía instar á Xunta para que "de xeito urxente" conveniase co goberno municipal ferrolano a súa reforma, "á vista das súas condicións de deterioración e desmantelamento".
"Equivócase de foro", replicoulle o popular Miguel Tellado, o grupo da cal, maioritario no Pazo do Hórreo, votou en contra desta proposición non de lei. "Este non é o pleno do Concello de Ferrol e alí corresponde facer propostas en relación co futuro do mercado de Caranza, que é de titularidad municipal", espetoulle.
Por parte de Alternativa, Consuelo Martínez avogara por manter un mercado "de proximidade" no que "todo o mundo sabe que o que alí se vende é produto galego"; mentres que a voceiro do Bloque no debate, Tereixa Paz, resaltara que este centro "podería ser un elemento de dinamización económica moi relevante, ademais de responder a unha necesidade esencial para a cidadanía".
