Foto: EUROPA PRESS
Abel Losada cuestiona a súa "credibilidade" e pregunta por que non exerceu antes as súas competencias en materia de defensa dos consumidores
SANTIAGO DE COMPOSTELA, 17 Abr. (EUROPA PRESS) -
O voceiro de Industria do PSdeG, Abel Losada, considerou este xoves que as "medidas" anunciadas polo presidente da Xunta, Alberto Núñez Feijóo, para baixar o prezo dos combustibles son "propaganda" e "unicamente retórica".
En declaracións a Europa Press, Losada criticou que Núñez Feijóo aproveite "as vacacións de Semana Santa" para realizar un anuncio que se sitúa no ámbito "da retórica e da propaganda" e dúbida da súa "credibilidade" para poñer en marcha de forma efectiva estas medidas.
Así, o deputado socialista explicou que, dentro do debate parlamentario, "Feijóo se situou sempre do lado das grandes empresas" fronte ás propostas do PSdeG. "A Súa credibilidade neste aspecto é inexistente para nós", sentenciou Losada.
Nesta liña, Abel Losada explicou que a defensa dos dereitos dos consumidores e usuarios é "competencia exclusiva" da Xunta de Galicia, polo que Núñez Feijóo podería actuar esta situación "que non é nova" dende que "é presidente". "Trátase de encher noticias con cuestións que están dende hai moito na vida dos galegos e cara ás que o Goberno non fixo nada", sentenciou o deputado socialista.
Por iso, Losada pediu a Feijóo que "goberne" e non se limite a "levar informes ao Consello da Xunta". Entre outras cuestións, Abel Losada criticou que a Núñez Feijóo "non lle preocupe" que Galicia conte coas "cifras de execución presupostaria máis baixas" e a Núñez Feijóo "se permita o luxo" de "quedar unha cifra por debaixo do límite do déficit" para "colgarse a medalla en Madrid", a pesar de que isto supón "prescindir de case 60 millóns de euros".
