O PSOE considera un "escándalo" a comparecencia de Pastor e o BNG esixe un calendario concreto sobre o AVE

SANTIAGO DE COMPOSTELA 9 Feb. (EUROPA PRESS) -

A deputada do PSOE no Congreso Carmela Silva tachou de "escándalo" a comparecencia deste xoves da ministra de Fomento, Ana Pastor, ao considerar que "non se decatou aínda de que é Ministra e elude calquera tipo de responsabilidade" sobre as infraestruturas en Galicia. Pola súa banda, o voceiro do BNG, Francisco Jorquera, reclamou un calendario concreto para o AVE e censurou tamén que "eludira" responderlle.

Silva, destacou que "nunca se viu no Congreso por parte dun ministro unha comparecencia deste nivel" e afirmou que é "incrible" que Pastor indique que o AVE a Galicia rematará cando se pague o que falta por inverter e "non sinale se o seu Ministerio e o Goberno do PP realizarán investimentos nas infraestruturas galegas".

"Se Pastor invertese nas infraestruturas galegas o que inverteu o Ministerio de Blanco estas poderían finalizarse nos prazos previstos, pero tememos que a comparecencia de hoxe indica de forma clara a total ausencia de Pastor nas infraestruturas galegas", criticou a deputada galega.

Jorquera, polo seu lado, esixiu un calendario "concreto e detallado" das actuacións pendentes na conexión de alta velocidade e reprochou que "se utilice a crise como coartada para xustificar novos incumprimentos con Galicia".

Así, o nacionalista coincidiu en que a conexión non poderá estar rematada en 2015, segundo figuraba no Pacto do Obradoiro asinado por Feijóo e Blanco, pero reclamou compromisos ao novo equipo de Fomento. Ademais, recriminou á Xunta que "preparase o terreo ao novo Goberno" para xustificar máis atrasos".