Foto: EUROPA PRESS
SANTIAGO DE COMPOSTELA, 10 Feb. (EUROPA PRESS) -
O secretario de Organización do PSdeG, Pablo García, criticou este venres que o presidente da Confederación de Empresarios de Galicia (CEG), Antonio Fontenla, "se apunte á demagoxia doada" e "se dedique a facer política dende o seu privilexiado sillón", ao tempo que lle recomendou "centrar os seus esforzos en axudar a resolver os problemas dos empresarios galegos".
A través dun comunicado, o dirixente socialista saíu así ao paso das declaracións do líder da patronal, nas que apostou por "reflexionar sobre a supresión de servizos públicos prescindibles ou a privatización daqueles que carrexan un custo desproporcionado" para as arcas públicas.
Tras reprobar a súa "frivolidade", advertiulle de que está a "desatender o que debe ser a súa prioridade, que é axudar aos empresarios que atravesan momentos de dificultade" ao "consentir o desmantelamento dos sectores produtivos" que levan consigo "as políticas do Goberno de Feijóo".
Neste sentido, García referiu que a Xunta "non paga facturas, atrasa certificacións de obra e reduce a licitación de obra pública". "Dada a súa actitude, non sería de estrañar que os empresarios conclúan que quen sobra, en realidade, é el", sentenciou o socialista.