av2" class="NormalTextoNoticia" itemprop="articleBody">
O rexedor lucense cifra en preto dunha trintena os colectores queimados dende o inicio do paro
LUGO, 31 Jul. (EUROPA PRESS) -
Outros tres colectores foron queimados na madrugada deste xoves na cidade de Lugo, dous na rúa Doutor Gasalla --ao lado da sede do Partido Popular-- e un en Lamas de Prado, segundo confirmou o alcalde Xosé López Orozco.
Dende que hai 52 días se iniciase a folga de lixos dos traballadores de Urbaser queimáronse "entre 26 e 27" colectores na cidade, concretou Orozco, que calculou que o custo de reposición será duns 1.000 euros por colector.
"Son colectores que pagamos todos e cada un dos veciños de Lugo, pero ademais hai uns danos colaterais nas fachadas das vivendas e o perigo que pode representar. É un tema preocupante", indicou o alcalde, ao tempo que garantiu que a Policía "traballa sobre o tema" para localizar o responsable.
Neste sentido, o alcalde fixo un chamamento para que cesen este tipo de ataques que "fan tanto dano" na cidade" e reclamou a empresa e traballadores de Urbaser que "se senten para poder chegar a un acordo canto antes".
"Mentres tanto, xa que se están a facer os servizos mínimos, está a traballar Tragsa, todos os lucenses, cando atopen o colector baleiro, que por favor deixen as bolsas no colector", recomendou o alcalde.
