Queremos Galego eleva ao 90% o apoio á folga contra o decreto lingüístico e a Xunta o sitúa por debaixo do 50%

SANTIAGO DE COMPOSTELA, 21 Ene. (EUROPA PRESS) -

A plataforma Queremos Galego elevou ao 90 por cento o seguimento da folga convocada no ensino non universitario para protestar contra a proposta de decreto do plurilingüismo da Xunta --que establece unha repartición das materias en tres terzos entre o castelán, o galego e unha lingua estranxeira--, mentres que a Consellería de Educación o situou por debaixo do 50 por cento.

Segundo manifestaron, en declaracións aos medios antes de partir a manifestación convocada en Santiago, Carlos Callón, en representación de Queremos Galego, así como o secretario nacional de CIG-Ensino, Anxo Louzao, o respaldo á folga, tanto de profesorado coma de estudantes, superou o 90 por cento. Por iso, cualificárona como unha "mobilización unánime" da sociedade galega e da comunidade educativa.

Pola súa banda, outras centrais sindicais participantes na protesta, como CC.OO., apuntaron máis dun 70 por cento de apoio á xornada de folga, á espera de coñecer os resultados definitivos, mentres que UGT resaltou que o seguimento estaba en aumento.

Pola contra, a Xunta resaltou que a incidencia da folga no ensino non universitario se situou por debaixo do 50 por cento, segundo os datos provisionais facilitados a Educación polas súas xefaturas provinciais ata as 12.00 horas.

"DÍA NORMAL"

Deste modo, a Administración educativa explicou que o dato, que se refire só aos centros públicos, "indica que a maioría absoluta dos profesores acudiron con normalidade a clase neste día de folga preventiva convocada e secundada por algúns sindicatos".

Neste sentido, Educación resaltou que "a totalidade dos centros educativos" abriron as súas portas e impartiron "maioritariamente" as clases "como nun día normal".

A consellería concretou que onde a folga foi seguida, os escolares "foron igualmente atendidos" polos servizos mínimos establecidos en cada centro. Ademais, puntualizou que o transporte e os comedores escolares "tamén funcionaron con total normalidade".