Quintana anuncia que a lei de cadea alimentaria suporá a creación da figura do mediador

SANTIAGO DE COMPOSTELA, 19 Jun. (EUROPA PRESS) -

A lei de cadea alimentaria suporá a creación da figura do mediador para todas as producións primarias que non sufriran un proceso de transformación, toda vez que os senadores do Partido Popular aceptaron incorporar a emenda da Xunta que formulaba este extremo, segundo avanzou a conselleira de Medio Rural e do Mar, Rosa Quintana, en declaracións a Europa Press.

Aínda que nun principio o Goberno autonómico, co presidente Alberto Núñez Feijóo á fronte, pactou unha serie de alegacións cos sindicatos que incluían a prohibición do prezo en orixe por debaixo dos custos de produción, o informe desfavorable da Comisión Nacional da Competencia decantou a aposta do Executivo galego cara á figura do mediador, que tamén reclamaban as centrais --especialmente Unións Agrarias--.

Quintana explicou que esta figura xa existe en Francia e deu "bo resultado", polo que, tras a aprobación definitiva da norma --a súa votación está prevista para comezos do mes de xullo--, será un regulamento que desenvolva os requisitos e condicións de funcionamento deste mediador. A conselleira entende que a súa constitución terá carácter estatal, posto que depende do Ministerio de Agricultura.

Segundo resaltou, trátase de "posibilitar a intervención" dunha figura de mediación para "supostos de desencontro", por exemplo, entre gandeiros e industrias lácteas nas negociacións previas á subscrición dun contrato homologado. Pero non solo cinguirase ao ámbito do leite, senón que servirá para resolver conflitos entre as partes en todos os subsectores primarios que non sufriran un proceso de transformación.

A conselleira, que se mostrou "encantada" pola aceptación da emenda, recordou que o relator dos populares no Senado será un galego, Enrique López Veiga, e reivindicou as xestións da Xunta co Ministerio de Agricultura e o Goberno central foron "da man" do propio Núñez Feijóo, que "dende o principio" lle deu unha relevancia "de primeiro rango" a este asunto.

FOLGA DE ENTREGAS A FINAIS DE 2012

De feito, os labores entre a Administración autonómica, as organizacións sindicais, a distribución e a industria intensificáronse a finais de 2012, despois de que o sector afrontase unha folga de entregas de leite en protesta polos baixos prezos que estaban a percibir as explotacións por cada litro.

Sobre o feito de que o texto legal non incorpore finalmente o veto á venda a perdas, Rosa Quintana insistiu en que "o espírito da lei" xa recolle a defensa dos sectores primarios, polo que subliñou a importancia da creación dun código de boas prácticas e a figura do mediador.

Agora, segundo recordou, á consellería quédalle "traballo para conseguir reestruturar ao sector", para o que trata de dotar dunha maior base territorial ás granxas e, así, que reducir a súa dependencia da compra de forraxes.