Ve "unha fatalidade" que tras "un inverno moi duro" agora que "as condicións do mar son boas" prodúzanse tres accidentes
SANTIAGO DE COMPOSTELA, 18 Abr. (EUROPA PRESS) -
A conselleira de Medio Rural e do Mar, Rosa Quintana, trasladou a mensaxe "de consolo" que lle fixo chegar o presidente da Xunta, Alberto Núñez Feijóo, e o resto do Goberno galego "a todos os tripulantes" do arrastreiro 'Mar Nosso', afundido o xoves a 20 millas de Navia (Asturias), con tres falecidos, dous desaparecidos e sete sobreviventes --cinco deles galegos--.
En declaracións este venres realizadas en Baiona (Pontevedra), Rosa Quintana fixo mención especial aos sobreviventes, que "perderon a compañeiros de traballo e pasaron moito medo, e necesitan saber que toda a cidadanía de Galicia está con eles", á vez que enviou a súa pésame a amigos e familiares dos falecidos.
Así, lamentou que "hai demasiadas" traxedias no mar nas últimas semanas relacionadas con Galicia. "Demasiadas é unha, imaxínese tres e moi seguidas no tempo", expresou en referencia aos naufraxios no último mes e medio do 'Santa Ana', 'Mar de Marín' e 'Mar Nosso'.
"Destacar o que son as fatalidades, tivemos un inverno moi duro, con moi mal tempo e non aconteceu nada, e agora, xusto cando as condicións do mar son boas e a xente pode saír a faenar sen problemas pois se dá a circunstancia de que en menos de dous meses levamos xa tres accidentes cunhas consecuencias catastróficas, porque perder a vida dunha persoa é moito, perder a de tantos é moito máis doloroso", apuntou Quintana na súa intervención.
Preguntada polas causas destes afundimentos, Quintana remarcou que "despois de cada accidente actívase a comisión de investigación de accidentes marítimos, que está a traballar xa en todos os casos". "Eu quero pedir o máximo respecto para os técnicos que fan todos os estudos precisos para que sexan eles os que nos digan que foi o que aconteceu en cada un dos casos", agregou.