A CORUÑA, 26 Abr. (EUROPA PRESS) -
A Audiencia Provincial da Coruña condenou este xoves a catro anos e dous meses de prisión a un home por maltratar e agredir á súa parella, após alcanzar as partes un acordo de conformidade.
Após recoñecer os feitos polos que a Fiscalía solicitaba inicialmente quince anos de prisión, o home aceptou unha sentenza de conformidade polos delitos de agresión sexual, lesións, malos tratos e ameazas.
As penas víronse rebaixadas ao aplicarlle as atenuantes de dilacións indebidas e reparación do dano, ao indemnizar xa á vítima con 30.000 euros.
Ademas da pena de cárcere, o tribunal impúxolle penas que suman 60 días de traballos en servizo da comunidade e unha orde de afastamento da vítima durante cinco anos.
Os FEITOS
O procesado iniciou en xaneiro de 2012 unha relación coa súa parella. Segundo o escrito de cualificación, no transcurso da mesma foron frecuentes os insultos e as ameazas, "prohibíndolle saudar a amigos e amigas para illala do seu círculo social".
Ademais, sinala que foron tamén "habituais as humillacións, desvalorizacións e insultos para menoscabala", até o punto de que a muller modificou os seus hábitos para compracer ao acusado. Del, asegura que a agrediu noutras ocasións con puñadas, labazadas e patadas.
Concretamente en agosto de 2013, após unha discusión nun parque, propinoulle labazadas na cara e patadas no costado. Noutra ocasión, cando ambos viaxaban en coche, comezou a darlle puñadas no ombreiro.
Noutro incidente, ameazouna, segundo recolle o escrito de Fiscalía, con publicar unhas fotografías íntimas se non renovaban a relación, despois de que a muller rompese con el, chegando a atentar contra a súa liberdade sexual nun día no que accedeu á súa vivenda.
