SANTIAGO DE COMPOSTELA, 27 Feb. (EUROPA PRESS) -
O relixioso detido en Lugo por supostos abusos sexuais a unha menor de 17 anos e a un minusválido está en "xaxún voluntario" e atópase "mal de ánimo" pola súa situación, que o está a "afectar moito".
Así o manifestaron este vieres a Europa Press fontes da súa defensa, que se reuniron durante a tarde co relixioso franciscano para coñecer o seu estado, despois das informacións que apuntaban a que podería comezar unha folga de fame.
Segundo manifestou o propio relixioso, "non se atopa en folga de fame", senón en "xaxún voluntario", unha situación que pretende, polo momento, manter no tempo.
Sobre esta cuestión, a súa defensa trasladoulle a súa intención de "convencelo" para que abandone o xaxún ou, pola contra, solicitará o xuíz "que o alimente".
En relación á súa situación, o relixioso atopa "mal de ánimo" e "moi afectado" polas noticias sobre el que pode ler nos medios. Ao mesmo tempo, trasladou a súa defensa que se atopa moi afectado por "fallarlle á orde" coa ruptura do seu celibato
Foi o pasado luns, tras a denuncia dun particular, cando se produciu o arresto por parte de axentes da Garda Civil do relixioso, residente na comunidade franciscana de Pedrafita do Cebreiro. Ao relixioso interviñéronselle dispositivos electrónicos, móbiles e ordenador, nos que se descubriron arquivos multimedia, entre os que se inclúen imaxes nas que aparece o relixioso cunha menor mantendo relacións sexuais.
RECURSO
A defensa do relixioso confirmou que a próxima semana presentará un recurso de apelación á medida de prisión comunicada e sen fianza decretada polo xulgado para o relixioso tras pasar a disposición xudicial.
Neste recurso, a defensa alegará que "non está demostrado" que houbese abusos sexuais a un novo minusválido duns 20 anos e defendendo que as relacións coa rapaza de 17 anos "foron consentidas".
Ademais, a defensa do relixioso comentou que tamén pedirán á comunidade franciscana "se hai posibilidade" de que o acollan noutro destino que non sexa o de O Cebreiro para seguir prestando o seu labor, onde residía ata o seu arresto o pasado luns.
