LUGO/PONTEVEDRA, 16 Mar. (EUROPA PRESS) -
A circulación ferroviaria quedou restablecida na tarde deste venres após un corte por un desprendemento no termo municipal de Tui (Pontevedra).
Segundo confirmaron a Europa Press fontes de Adif, o restablecemento da circulación en Tui produciuse ás 16,19 horas deste venres após o corte no tramo Tui-Portugal por mor dun desprendemento de terra e pedras.
Pola súa banda, en Pantón (Lugo) Adif prevé que se restableza a circulación ferroviaria sobre as 19,00 horas deste venres despois de que sobre as 1,30 horas descarrilase á locomotora dun tren de pasaxeiros, debido ao que foi atendido o maquinista, que resultou ferido leve.
Precisamente, foi un desprendemento de terras o que, sobre as 1,30 horas deste venres, fixo descarrilar á locomotora do tren hotel que circulaba pola vía férrea Ourense-Monforte con destino a Pontevedra ao seu paso por Pantón.
O 112 Galicia relatou que a bordo viaxaban unhas 47 persoas que resultaron ilesas e que permaneceron no interior do convoi até a chegada dunha nova máquina locomotora que conduciu os vagóns a Ourense.
MAQUINISTA ATENDIDO
O maquinista necesitou asistencia, xa que presentaba algunhas lesións, aínda que de carácter leve, polo que foi atendido no punto sen que fose necesaria a súa evacuación.
En concreto, o 061 enviou unha ambulancia asistencial e un médico do Punto de Atención Continuada de Monforte para atender ao home L.A.C.V., de 41 anos, confirmaron a Europa Press fontes sanitarias.
Pola súa banda, o persoal de ADIF enviou á zona varias retroescavadoras para liberar a vía e restablecer canto antes a circulación ferroviaria.
