Rueda celebra que o PSdeG se mostre disposto a negociar a reforma electoral e aspira ao máximo consenso posible

EUROPA PRESS

SANTIAGO DE COMPOSTELA 22 May. (EUROPA PRESS) -

O vicepresidente da Xunta e secretario xeral do PPdeG, Alfonso Rueda, celebrou este mércores que o PSdeG se mostre disposto a negociar a reforma da lei electoral --aínda que os socialistas manteñen o seu rexeitamento ao recorte de deputados-- e reafirmouse en que o seu partido aspira a lograr "o máximo consenso posible".

En declaracións aos medios, recordou que o PPdeG incorporou no seu programa o compromiso electoral de reducir deputados e reiterou que pretende levalo adiante. Ao respecto, manifestou que desexaría que o resto de forzas "entendesen que vai supoñer un aforro, non un prexuízo nin un funcionamento menos democrático como se dixo".

Así as cousas, tras afirmar o BNG que non acudirá á reunión que convocará o PP para abordar este asunto e de que AGE o condicionase a que asista algún outro grupo, Rueda sinalou que "non ten moito sentido" que o resto de partidos que conforman o arco parlamentario galego "non se queiran nin sequera sentar falar".

Por iso, sinalou que "se é verdade que o PSdeG ten unha proposta, benvida sexa". "Estamos a desexar sentar, falala e ogallá poidamos chegar a un consenso", resaltou o número dous do PPdeG, convencido de que, con independencia do contido da proposta que aínda non coñece, "esa é a postura intelixente".

"Se de verdade queren sentar a falar xa é un avance e creo que BNG e AGE se equivocan", subliñou Rueda, "quen advertiu que o que non se vai equivocar é o PPdeG, que se presentou ás eleccións co compromiso de reducir deputados e está disposto a seguir adiante". "Ogallá que entendan que sentar a falar deste tema e chegar ao máximo consenso posible é o máis beneficioso para todos", resolveu.