O 'Sakoba' ten unha tripulación de 16 persoas, incluído un español e dez kenyanos

   A tripulación do pesqueiro 'Sakoba' compóñena un total de 16 persoas, entre elas un español e dez kenyanos, segundo revelou este martes Andrew Mwangura, do Programa de Asistencia a Mariños de Africa Oriental, que segue moi de preto os casos de pirataría nesta rexión.

   En concreto, o capitán do buque secuestrado é un portugués nacionalizado español e residente en Vigo, segundo confirmaron a Europa Press fontes da empresa que comercializa o peixe da armadora do 'Sakoba', a empresa Malaca Shipping, con base no porto do Berbés, que importa directamente o peixe --peixe espada e quenlla--. Esta empresa só presta apoio loxístico vinculado á comercialización das capturas do barco propiedade da armadora keniata Africa East Deep Fishing.

   Segundo Mwangura, os piratas secuestraron o barco con bandeira de Kenya fronte á costa de Somalia posiblemente para usalo como "buque nodriza" co que lanzar máis ataques. De acordo con este experto, o secuestro produciuse a semana pasada.

   "Creo que os piratas o apresaron e agora o están a usar como buque nodriza para atacar outros barcos", indicou a Reuters, precisando que a tripulación a compoñen dez kenyanos, dous senegaleses, un español, un polaco, un caboverdiano e un namibio.

   Mwangura, que dixo que non está claro onde se produciu exactamente o secuestro, precisou que un director da compañía que opera o barco está a viaxar xa a Kenya para negociar a súa liberación. "O barco estivo a operar dende 2005 en augas de Kenya e Tanzania. Leva moito tempo aquí, con bandeira kenyana e cunha licenza de pesca kenyana", aclarou.