Sanz súmase a Feijóo e esixe que se aprace o pagamento dos anticipos ata que haxa "unha recuperación económica"

SANTIAGO DE COMPOSTELA 3 Sep. (EUROPA PRESS) -

O presidente de La Rioja, Pedro Sanz, sumouse este xoves ao seu homólogo galego, Alberto Núñez Feijóo, na súa petición ao Goberno de que aprace o pagamento da débeda das comunidades tras a liquidación das contas do financiamento autonómico correspondentes aos exercicios de 2008 e 2009 ata que se produza "unha recuperación económica".

Tras manter un encontro con Feijóo en Santiago, Sanz cualificou de "barbaridade e atropelo" a petición do Goberno central de aboar esta débeda en plena crise económica e mostrouse partidario de que se "atrase" a devolución de anticipos ata que esta non supoña "un prexuízo" para os presupostos autonómicos.

En ton irónico, Sanz preguntouse se, ás veces, non resulta necesario "acudir a Santa Rita" --en referencia ao refrán 'Santa Rita, Rita, o que se dá non quita'-- e apostou por buscar "unha mellor" saída para evitar que as autonomías teñan que enfrontarse ás súas contas cun "esforzo engadido".

"O que non se pode facer é que en plena crise económica se lles pida ás comunidades un esforzo engadido ante a falta de ingresos e que se obrigue a devolver un diñeiro que nos gastamos porque o Goberno nos dixo que nolo podiamos gastar", esgrimiu.