A axencia de cualificación crediticia eleva a nota de sete bancos españois e mantén o doutros sete
SANTIAGO/MADRID, 27 Nov. (EUROPA PRESS) -
A axencia de cualificación crediticia Standard&Poor's deixou sen cambios o rating 'B+' con perspectiva 'negativa' de Banco Popular e a nota 'B' con perspectiva 'estable' de Abanca.
En total, elevou o 'rating' de sete bancos españois e reafirmou a nota doutros tantos ante o "progreso" na corrección dos desequilibrios da economía española, segundo informou nun comunicado.
Ante este panorama, S&P prevé que as provisións da banca española tendan á baixa, de modo que alcancen niveis normalizados a finais de 2016. Ademais, outorga perspectiva estable á maioría das cualificacións dos bancos españois.
"Despois de anos de axustes, vemos unha tendencia de estabilización no mercado inmobiliario e a economía regresando ao crecemento", explica. Así as cousas, estima unha senda "estable" dos "riscos" da economía e valora o axuste da banca na súa exposición a sectores problemáticos.
En consecuencia, mellorou a súa avaliación dos riscos económicos aos que se enfrontan os bancos españois, pasando da categoría '7' á categoría '6', o que indica que se están a reducir, aínda que parten dun nivel elevado.
OS QUE SOBEN
En concreto, elevou de 'BBB-/a-2' a 'BBB/a-3' con perspectiva 'estable' os ratings a longo e curto prazo de Caixabank e Cecabank, mentres que mellorou dende 'BB+/B' a 'BBB-/a-3' con perspectiva 'estable' o de Bankinter, sacándoo así da categoría de grao de especulación ou 'bono lixo'.
Así mesmo, elevou dende 'BB' a 'BB+' a cualificación de Sabadell e da división española de Barclays Bank, aínda que o primeiro ten unha perspectiva 'negativa' e o segundo mantense en revisión para unha posible mellora, que comezou o pasado 4 de setembro.
No caso de Bankia, a axencia subiu a súa cualificación dende 'BB-' a 'BB' con perspectiva 'negativa', dous anos despois de pechar o seu plan de recapitalización. Pola súa parte, a nota da súa matriz, Banco Financeiro e de Aforros (BFA) pasou de 'B' a 'B+', tamén con perspectiva 'negativa'.
SEGUEN IGUAL
Por outro lado, a axencia confirmou as notas de Banco Santander, situado en 'BBB+', e da súa subsidiaria "altamente estratéxica" Santander Consumer Finance S.A, situada en 'BBB', en ambos os dous casos con perspectiva 'estable'.
Nesta liña, mantén a cualificación 'BBB' con perspectiva 'estable' de BBVA e a nota 'BBB-' con perspectiva 'estable' de Kutxabank, mentres que no caso de Ibercaja Banco a confirma en 'BB' con perspectiva 'positiva'.