A sentenza chama a atención sobre que o nacionalista non figura no atestado pero si nunha denuncia presentada case un mes e medio despois
SANTIAGO DE COMPOSTELA, 30 Oct. (EUROPA PRESS) -
A Subdelegación del Gobierno na Coruña foi condenado en costas cun límite de 700 euros polo Xulgado do Contencioso-Administrativo número 1 da cidade, que declara a nulidade da resolución recorrida polo voceiro parlamentario do BNG, Francisco Jorquera, por vulneración dos seus dereitos fundamentais durante a protesta na que participou con motivo do desafiuzamento de Aurelia Rey.
Jorquera recorreu a sanción que se lle impuxo no seu día por "provocación de reaccións no público que alteren ou poidan alterar a seguridade cidadá".
Agora, nunha sentenza con data deste luns 27, o xuíz estima o recurso interposto polo voceiro do Bloque na Cámara, aínda que indica que ante o fallo cabe recurso de apelación ante o Tribunal Superior de Xustiza de Galicia (TSXG) no prazo de 15 días a partir da súa notificación.
En rolda de prensa este xoves, o nacionalista destacou as "evidentes contradicións" dos informes policiais e declaracións ante o xuíz, ademais de interpretar que, á luz deste ditame, "habiamos que recorrer todas as sancións individualmente".
"O BNG está a denunciar de xeito reiterado que se está a producir no conxunto --do estado-- un recorte de liberdades, a lei mordaza ás protestas contra as políticas inxustas, e entre outros mecanismos de coacción --úsanse-- as multas; buscan coaccionar, e lévalles a vulnerar o dereito de reunión e de manifestación... diso é do que fala a sentenza", resaltou.
CONTIDO DA SENTENZA
En concreto, a sentenza, que recolle Europa Press, sinala que a comunicación da denuncia por parte dun policía é "posterior ao atestado" realizado con motivo dos feitos.
"Da proba practicada", apunta, "non resulta (...) unha explicación clara, coherente e crible da razón pola que non se inclúe no atestado ao hoxe recorrente e posteriormente case un mes e medio máis tarde se lle denuncia".
Se se fai "caso" a contido de denuncia, agrega, a actuación de Jorquera foi a do "xefe visible dos alí concentrados". "Non obstante, unha vez analizadas as manifestacións dos policías en acto de xuízo, parece entreverse que o que se denomina empuxón carecía para eles de relevancia penal, o que produce a consecuencia de que quizais non fose tal, xa que nin tan siquiera mereceu a consideración por parte da policía de posible falta de respecto á actuación dos axentes", chama a atención.
A sentenza constata que a Administración sancionou o voceiro do Bloque na Cámara "con base á denuncia policial", pero que "non existe" nela "nin na resolución sancionadora" unha "especial valoración de encaixe sancionador do tipo". "Sendo insuficiente unha fotografía para demostrar e integrar o tipo sancionador", apostila.
Neste sentido, recorda que "necesariamente se debe concretar o contido do berro ou xesto" para poder entrever e valorar a provocación de reaccións no público que alteren ou poidan alterar a seguridade cidadá.
Non obstante, "a falta de mención e concreción dun ou outro incide directamente no principio de indefensión e da legalidade" e "tampouco se pode valorar como se chega á conclusión de que era a cabeza visible dos alí concentrados e non se lle inclúe pola policía no atestado".
Por todo iso, ante "a falta de integración do tipo nalgunha expresión ou acción concreta" e a falta tamén "de calquera proba" que o vincule como cabeza visible, o xuíz entende "vulnerado" o artigo 24 da Constitución, e en consecuencia tamén os preceptos 20 e 21 da Carta Magna.
