SANTIAGO DE COMPOSTELA, 11 Feb. (EUROPA PRESS) -
O interior da provincia de Pontevedra, o Sur e centro da de Lugo e Ourense permanecerán este sábado en alerta amarela por temperaturas mínimas que se situarán por debaixo os 4 graos negativos.
Segundo o boletín de tempo meteorolóxico adverso para este sábado publicado por MeteoGalicia, o ceo estará despexado, os ventos en calma e a presenza de aire frío deixará xeadas importantes durante a madrugada.
En concreto, o nivel de alerta será amarelo ata as 12.00 horas no centro e Sur da provincia de Lugo; o interior de Pontevedra; e a provincia de Ourense, por temperaturas localmente por debaixo dos -4 graos en xeral e dos seis graos baixo cero en áreas de montaña.
Esta alerta amarela manterase na xornada do domingo nos mesmos puntos, así como na montaña luguesa, día no que as xeadas continuarán sendo importantes de madrugada.