SANTIAGO DE COMPOSTELA, 28 Jul. (EUROPA PRESS) -
Unha familia da parroquia compostelana de Aríns sobre a que pesa unha orde de desafiuzamento conseguiu frear por segunda vez á comitiva xudicial e aprazar a decisión ao mes de setembro.
Dende primeira hora da mañá, segundo informou Stop Desahucios Compostela, varias decenas de veciños e integrantes da plataforma concentráronse na casa familiar en Aríns para evitar o lanzamento, que fora fixado para este luns despois da prórroga establecida hai 13 días, cando tamén se freou á comitiva xudicial.
O 15 de xullo, primeira data para o desafiuzamento, a comisión xudicial concedeu 10 días de prazo adicional á familia para negociar a súa situación, despois de que Carlos e María, habitantes da vivenda, interpuxesen unha denuncia por estafa contra o home que lles reclama o abono da casa.
Non obstante, as negociacións non foron frutíferas, co que volveu fixarse para este luns o desafiuzamento da familia, que finalmente foi postergado ata setembro.
En compañía dunha grande presenza policial, o secretario xudicial e un procurador en representación da parte acredora compareceron a primeira hora deste luns na vivenda, onde se congregaran tamén decenas de veciños en apoio á familia.
Aínda que a súa intención era executar o desafiuzamento, finalmente, debido aos problemas de mobilidade dun dos habitantes da vivenda, de avanzada idade, a comitiva decidiu frealo e aprazalo ata setembro.
A FAMILIA DENUNCIA UNHA ESTAFA
A familia desafiuzada anunciou por estafa a Rachid Messaudi, un particular francés ao que recorreron para poder pagar a hipoteca da casa, á que non podían facer fronte. A Plataforma Stop Desahucios indicou que, mediante enganos non clarificados, o home fixo crer que el poría o diñeiro da débeda e que farían "un apaño" para que eles puidesen seguir no futuro coa súa propia vivenda.
A familia de Carlos e María, que pediron amparo por parte da xustiza para que tome en consideración a denuncia, herdara o terreo en Aríns o que decidiron construír a casa, que está inacabada, "coas súas propias mans".
Ao non poder asumir os gastos de arquitecto, impostos e todo o relacionado coa legalización da vivenda, a familia pediu unha hipoteca no ano 2006 valorada en 35.000 euros.
Non obstante, a situación complicouse cando a familia quedou en paro e a familia deixou de pagar a hipoteca. Segundo Stop Desahucios, as comisións de demora fixeron que a débeda ascendese ata os 68.000 euros, momento no que a familia empezou a sufrir presión do banco, que lles advertiu dunha execución hipotecaria.
Por iso, Carlos e María víronse obrigados a recorrer ao "presunto estafador" Rachid Messaudi, que reside en Benalmádena (Málaga), e que inicialmente lles fixo unha oferta de compra a catro meses.
COMPRA DA VIVENDA
A pesar de que a débeda da familia ascendía a 68.000 euros, segundo os papeis do notario o home agora denunciado adquiriu a vivenda por 105.000 euros. Catro meses despois desta "complexa" compra, o particular francés reclamoulles para poder recuperar a casa 150.000 euros.
Stop Desahucios sinalou que a familia "sufriu unha estafa" e que non se decatou" da cantidade que figuraba nos documentos, xa que se sentían "nerviosos" mentres estaban no notario e crían "estar a resolver o problema".
