Foto: EUROPA PRESS/REMITIDO
Denuncia un Parlamento "amordazado" e un Goberno "ausente" mentres a rúa "ferve" porque todos os sectores están "postos"
SANTIAGO DE COMPOSTEla, 10 Feb. (EUROPA PRESS) -
O secretario xeral do PSdeG, Pachi Vázquez, fixo este venres un novo chamamento á unidade dentro das súas filas tras mostrarse "convencido" de que ao seu partido le "van tocar grandes responsabilidades políticas". "A Galicia faille falta un PSdeG forte", incidiu, dada a "situación crítica" que atravesa a comunidade mentres o presidente Feijóo permanece "de brazos caídos".
En rolda de prensa tras a primeira reunión do Grupo Parlamentario Socialista deste período de sesións, Vázquez destacou que o tempo que resta ata o verán é "moi importante" porque se trata do "tramo final" da lexislatura e porque Galicia está "nunha situación moi crítica". "Non hai máis que ver como están as rúas, con mobilizacións de todos os sectores pedindo á Xunta decisións ou a corrección de decisións", evidenciou.
Neste punto, fixo fincapé en que o Goberno galego afronta este período con "parálise e desorientación". "Non é normal que o presidente leve dous meses sin dar a cara, coas rúas fervendo e todos os sectores tremendo", resaltou, insistindo en que Feijóo "escapou, está fuxido, desapareceu". "Só está en actos protocolarios, mantendo o tipo, con discursos neutros, planos", subliñou.
Reforzou estas críticas sinalando que "o manual de funcionamento" da Xunta, os seus presupostos, é "irreal", xa que prevé un crecemento do 1,1 por cento mentres os datos de distintos organismos auguran unha caída do 1,3 por cento. "Demostra que o Goberno galego non ten solucións para saír da crise", sentenciou, convencido de que Feijóo pretende converter o último período de sesións en "tempo de desconto".
Así as cousas, Pachi Vázquez asegurou que o grupo parlamentario que preside "traballará o tempo que quede" ata a celebración das eleccións autonómicas formulando "alternativas" para solucionar os tres principais problemas dos galegos: o paro, a economía e os servizos públicos. "A Cámara será o foro de expresión da cidadanía", sostivo o socialista, rexeitando así que o Parlamento continúe "amordazado".
ELECCIÓNS, "ENTRE XUÑO E OUTUBRO"
Preguntado sobre as datas que manexa o seu partido para un eventual adianto electoral, o xefe de filas do PSdeG recordou que Feijóo deu por feito que fixar os comicios en outubro sería un adianto técnico e indicou que "en foros moi conservadores" está a haber debate ao respecto. "Nós cremos que Feijóo dá por esgotada a lexislatura, só queda ver cando convoca as eleccións", resolveu, convencido de que serán "entre xuño e outubro".
Neste escenario, advertiu de que a convocatoria anticipada supón, para o mandatario autonómico, "recoñecer o seu fracaso". Ademais, o debate en torno ás datas, ao seu xuízo, "debilita a Galicia e o Goberno" e "crea grandes incertezas" nun momento en que son necesarias "seguridades e itinerarios fixos".
O PP "FRACASOU"
En canto ás posibilidades do PSdeG para recuperar a Xunta, o dirixente socialista dixo que esa decisión corresponde aos cidadáns, que ven que o proxecto político do PP "fracasou".
Ao fío diso, destacou que máis de 271.000 persoas están en situación de desemprego en Galicia e que se prevé que outras 30.000 se engadan a esa lista ao longo do presente ano; que a caída da produción industrial en Galicia é "catro veces maior" que a media estatal e que existe "unha flagrante deterioración" dos servizos públicos.
Así mesmo, os principais sectores produtivos están "postos": os traballadores do sector naval están "na rúa", o sector eólico "recibe o golpe de graza" cun decreto estatal que a Xunta "non ten a valentía de recorrer", "non hai nin un só ladrillo posto" no plan acuícola e o sector financeiro galego "xa non existe".
"Feijóo pode dicir o que queira, pero a realidade que vemos cotidianamente é moi dura", lamentou, para asegurar que "nunca" viu en Galicia "unha situación de incerteza e desesperanza" como a que se vive, ao seu xuízo, nos últimos días.
"O QUE GOBERNA, TEN QUE GOBERNAR"
Tras debuxar este escenario, preguntado sobre a influencia da situación interna das dúas formacións da oposición na política autonómica, Vázquez destacou que o seu partido está a "formular propostas e acordos" porque ten "proxecto" e negou que a celebración dun congreso o próximo mes "debilite" a organización. Ademais, "ao día seguinte" de finalizado o conclave, os socialistas "están a traballar" de novo, garantiu.
"O congreso, é necesario facelo", argumentou, se ben lamentou que "outras comunidades teñen un congreso na súa federación e eleccións en catro anos, mentres que Galicia ten "un congreso agora e autonómicas...". "Non me atrevo a dicir cando", indicou, consciente de que nin o país nin o presidente aguantan". "Ou este Goberno arranca e tira de Galicia, ou se segue co motor apagado, este país non pode seguir así", sentenciou.
Finalmente, negou que o debate interno, que, ao seu entender, debe producirse, pero "nas sedes", dane o partido neste momento. "Aos cidadáns preocúpalles un detalle: que o que goberna, ten que gobernar", resolveu, despois de asumir que "a xente da rúa non quere" coñecer os "problemas" dos políticos, senón que espera que estes se dediquen a "arranxar os problemas da xente".