SANTIAGO DE COMPOSTELA, 21 Mar. (EUROPA PRESS) -
Os servizos de Renfe comezaron a circular "con normalidade" na mañá deste mércores entre Vigo e Ourense, unha vez que Adif restableceu a circulación ferroviaria ás 5,00 horas.
Segundo explicou Renfe, Adif finalizou a reparación da infraestrutura no tramo Arbo-Frieira --na provincia de Pontevedra--, que quedara danada o pasado luns 12 de marzo a causa do temporal.
O primeiro servizo en pasar polo tramo cortado foi o tren con saída de Vigo-Guixar ás 7,05 horas e chegada a Ponferrada ás 11,41 horas.
Renfe lembrou que "mantivo operativo, desde o pasado día 12, un Plan Alternativo de Transporte para os trens afectados pola incidencia".
"Por este motivo, algúns trens realizaron parte do seu percorrido por estrada, e noutros casos viron modificado o seu itinerario", puntualizou a compañía.
