av2" class="NormalTextoNoticia" itemprop="articleBody">
VIGO, 17 Sep. (EUROPA PRESS) -
O Xulgado de Primeira Instancia número 10 de Vigo citou o alcalde da cidade, Abel Caballero, a un acto de conciliación que se celebrará nesa sala o próximo 8 de outubro ás 10,00 horas, a petición da Asociación de Veciños de Teis, por supostas aldraxes cara a directivos da entidade.
Segundo sinalou a asociación, se non se chegase a un acordo ese día, ou se Caballero non se presentase (ou un representante legal), valoraría a posibilidade de presentar unha querela por aldraxes e calumnias.
A denuncia da entidade veciñal prodúcese a raíz dunhas manifestacións do rexedor o pasado mes de xuño nunha televisión local, na que explicaba que o Concello non renovara o convenio de colaboración coa Asociación Veciñal de Teis, por valor de 55.000 euros, porque os seus directivos "queren o diñeiro" para asuntos particulares deles".
"Queren que lles regalemos o diñeiro para os seus asuntos particulares", afirmaba o rexedor, segundo recolleron os directivos da asociación.
Ante esas graves acusacións, a directiva veciñal insistiu en que todos os gastos derivados da súa xestión foron debidamente xustificados", e advertiron Caballero que non aceptan "leccións de honestidade" de quen mantén no seu goberno un concelleiro imputado (por Ángel Rivas).
"Nós aínda non temos ningún directivo imputado, e en 38 anos de existencia da asociación, aínda non veu a Policía Xudicial a rexistrar a nosa sede, como si pasou no Concello na Operación Patos," proclamou Anxo Iglesias, secretario da entidade.
