Os populares agradecen "a receptividade amosada" polo Goberno de Mariano Rajoy
SANTIAGO DE COMPOSTELA, 1 Ago. (EUROPA PRESS) -
A Xunta de Galicia afirma que o prazo extraordinario de seis meses para que os emigrantes retornados poidan regularizar as súas pensións procedentes do estranxeiro "responde ao acordo unánime do Parlamento e a unha proposta trasladada ao Ministerio de Facenda polo presidente galego, Alberto Núñez Feijóo".
A devandita medida, incluída nunha disposición do proxecto de lei de reforma do IRPF aprobado este venres no Consello de Ministros, afectará os pensionistas galegos que volveron á comunidade tras traballar na emigración.
A Consellería de Facenda, a través dun comunicado, agradece ao Goberno central a decisión, e asegura que desta forma os pensionistas "non pagarán sancións, recargas nin intereses de demoras". "E tamén se lles condonarán as sancións, xuros de mora e recargas xa impostas con anterioridade", engade.
"O Goberno galego, dende un primeiro momento, defendeu que estes pensionistas actuaron no seu inmensa maioría sen ánimo defraudatorio, e polo tanto non cabía a imposición de sancións", apunta Facenda.
Neste sentido, sinala que a Cámara e o Executivo autonómicos "realizaron xestións para trasladar as demandas deste colectivo á Administración central", xa que se trata dunha competencia deste ámbito.
Ademais, engade que a titular do departamento, Elena Muñoz, mantivo "varios encontros" cos representantes da plataforma de afectados, "para coñecer de primeira man a súa situación". E dirixiuse "en varias ocasións" o ministro Cristobal Montoro "para que tivese en conta a súa problemática, así como para informalo da posición adoptada por unanimidade no Parlamento en defensa deste colectivo", subliña a consellería.
O prazo extraordinario abrirase en xaneiro de 2015 e terá unha duración de seis meses, nos que os afectados poderán presentar autoliquidacións complementarias dos períodos impositivos non prescritos nos que percibiron pensións do estranxeiro pendentes de declarar.
Desta forma, poderán poñerse o corrente das súas obrigas tributarias e serán exonerados de calquera sanción, recarga ou xuros de mora no momento en que ingresen o 100% da cota tributaria correspondente.
PPdeG
Igualmente, o grupo popular emitiu outra nota de prensa para manifestar a súa "satisfacción" pola decisión acordada este venres. "O Goberno central recolle a demanda aprobada por unanimidade no Parlamento galego e defendida pola Consellería de Facenda", resalta.
Así, agradece "a receptividade mostrada polo Goberno de Mariano Rajoy" ante esta solicitude realizada tanto dende o Pazo do Hórreo como dende a Xunta.
