A Xunta elaborará un plan de recuperación de bancos marisqueros improdutivos para crear novos empregos

   A conselleira do Mar, Rosa Quintana, avanzou hoxe que o seu departamento comezará a elaborar as bases dun plan de recuperación de bancos marisqueros improdutivos para xerar novos empregos neste sector. A titular da Administración pesqueira galega solicitou a colaboración das profesionais do sector ao afirmar que estas poden indicar "o mellor que hai que facer" nesta liña por ser as que máis coñecen as zonas de produción.

   Na inauguración do 'IV Encontro de mariscadoras. Facendo camiño', Quintana apostou pola recuperación das zonas hoxe improdutivas entre a Administración galega e o sector marisquero galego como fórmula de xeración de postos de traballo.

   Malia afirmar que, nestes momentos, non se dan as condicións necesarias para incorporar "nin sequera" a 1.000 novas produtoras, a conselleira interpretou que a elaboración dun plan de recuperación de zonas improdutivas permitirá dar á sociedade galega postos de traballo para "moitos homes e mulleres que o están a necesitar".

   A titular de Mar apelou á colaboración das representantes das 38 agrupacións de mariscadoras que entre hoxe e mañá participarán nestas xornadas para lograr "xuntos" ese desenvolvemento e recuperar "aqueles niveis de mariscadoras que tiñamos cando empezamos a falar de 20.000 persoas", en referencia a épocas nas que o sector estaba integrado por este número de produtoras --antes da súa profesionalización na década dos 90-- .

   Quintana destacou o grao de organización alcanzado polo sector dende que na década dos 90 se potenciase a súa actividade dende a perspectiva profesional para que fose "recoñecida e valorada". Neste punto, considerou que esa organización constituíu un exemplo para Galicia e "toda Europa", de forma que logrou que a Unión Europea tamén apostase polo marisqueo.

   "Esa organización que empezamos a sementar polo ano 90 fixo que, despois do pouco apoio que, ao meu xuízo, recibistes nestes últimos catro anos, forades capaces de sobrevivir e de mantervos organizadas", sinalou, ao tempo que incidiu en que ese factor é necesario para debater acerca dos problemas e solucións do sector de cara ao futuro.

IMPLICACIÓN DO SECTOR CONTRA O FURTIVISMO

   Así mesmo, a conselleira reclamou o apoio das profesionais do mar ao labor de loita do furtivismo do seu departamento, unha "lacra" da que lamentou que volva ocupar as páxinas de todos os xornais" e da que afirmou que en 2005 era algo "anecdótico".

   "Nós sós non podemos, ten que ser unha implicación do sector, a Administración e a sociedade en xeneral", aseverou. Neste punto incidiu en que os produtos do mar que se comercialicen a través das vías legais han de ser "o único bo".