Os traballadores ofrécense a "demostrar" que o estaleiro "volve funcionar" se o propietario abandona a empresa
PONTEVEDRA, 9 Feb. (EUROPA PRESS) -
A Consellería de Economía e Industria mantén negociacións con "empresas potencialmente interesadas" en facerse cargo do estaleiro Factoría Naval de Marín, que se atopa en preconcurso de acredores e que a semana próxima podería anunciar a extinción de 35 empregos.
O conselleiro de Industria, Javier Guerra, tamén estudará "con detalle" a intención que lle trasladaron os propios traballadores de asumir a xestión, unha posibilidade que valorou de modo "moi positivo".
Tras reunirse en Marín --por terceira vez nos últimos meses-- co comité de empresa, Javier Guerra reiterou que a Xunta segue estando "comprometida e preocupada" pola situación de Factoría Naval, que dende 2009 vén arrastrando unha débeda que xa ascende a 100 millóns de euros.
Guerra cualificou de "grave e moi complicada" a situación do estaleiro, que achacou á "mala xestión". Ata o 30 de marzo, data na que finaliza o prazo do preconcurso, o titular de Industria comprometeuse a "facer o posible para que o estaleiro teña viabilidade".
Javier Guerra explicou que o obxectivo da Xunta é "sacar o estaleiro adiante, que non vaia a liquidación e siga co maior número de traballadores".
Non obstante, Guerra adiantou que nin o Igape nin Xesgalicia volverán inxectar fondos públicos en Factoría Naval, argumentando que "xa puxeron moito diñeiro para garantir o futuro deste estaleiro e da industria auxiliar desta bisbarra".
Así, Guerra apelou ao "compromiso" tanto do propietario de Factoría Naval, José María Suescun, que posúe un 91% da empresa, coma das entidades financeiras integradas no conxunto de accionistas, Novagalicia Banco e Bankia, para "poñer cada un da súa parte e que este estaleiro sexa viable".
O concelleiro de Industria asegurou que dende a Xunta se fixeron "infinidade de xestións" para "esixir" que Factoría Naval "siga adiante" rebaixando a débeda e elaborando un novo plan de negocio, posto que o anterior "non se cumpriu", criticou Guerra.
RETIRADA
O presidente do comité de empresa, Nicolás Pérez, reclama "que saian os propietarios", porque só dese xeito os traballadores poderían "recuperar a clientela" que deixou de varar os seus barcos en Factoría Naval "debido ao trato do actual dono".
Posto que os traballadores teñen "os contactos dos clientes de toda a vida" e que agora son "remisos a traballar connosco", dende o comité vense capacitados para "demostrar que isto volve funcionar, que sabemos facer e reparar barcos", pero só se se dá a circunstancia de que Suescun abandona a propiedade de estaleiro.
Nicolás Pérez recordou que fai pouco menos dun ano Factoría Naval construíu "o buque tecnoloxicamente máis avanzado da historia de España"; unha bagaxe que considera que podería atraer "xente interesada no conxunto de accionistas", xa que os traballadores carecen de liquidez para conseguir o control do estaleiro.
Durante a súa reunión co conselleiro de Industria, Nicolás Pérez urxiulle para que se axilicen as negociacións co propietario e as entidades financeiras, xa que "non hai tempo e sobre as nosas cabezas pende un ERE de extinción".
O voceiro dos traballadores mantén a esixencia de "que se cumpran os acordos", que condicionaban as axudas da Xunta ao mantemento dos postos de traballo.
Mentres tanto, o equipo de Factoría Naval seguirá mobilizándose e este venres ás 15:00 horas volverán escenificar o enterro do estaleiro polas rúas de Marín.