A Xunta ordena o pagamento anticipado de máis de 12 millóns de euros da prima por vaca nutriz a 12.000 gandeiros

   A Consellería do Medio Rural, a través do Fondo Galego de Garantía Agraria (Fogga), ordenou a transferencia a 11.806 gandeiros do anticipo da prima por vaca nutriz, por un importe total de 12.014.497 euros.

   Segundo explicou a Xunta nun comunicado, este anticipo corresponde ao 60 por cento do importe total da axuda por vacas nutriz con dereitos de prima, solicitada en 2009. O 40 por cento restante, percibirano os gandeiros antes do próximo 30 de xuño, unha vez que o Ministerio de Medio Ambiente fixe os importes por cabeza correspondentes á campaña actual.

   De momento, o adianto do pagamento da Xunta ten por obxecto "mellorar a liquidez" dunhas explotacións que "están a soportar un importante incremento" nos custos de produción derivados, fundamentalmente, dos prezos de pensos e combustibles.

   Por provincias, Lugo é a maior beneficiada tanto polo número de produtores coma polo importe pagado, con 6.128 gandeiros que percibiron máis de 7,5 millóns de euros. No lado oposto, en Pontevedra cobraron case 620.000 euros un total de 864 produtores.