SANTIAGO DE COMPOSTELA, 16 Abr. (EUROPA PRESS) -
A Xunta de Galicia iniciou este mércores a tramitación do proxecto para arranxar un tramo do Camiño Fisterra-Muxía ao seu paso polo concello coruñés de Dumbría, ao que solicitou a licenza municipal pertinente para executar esta actuación.
A intervención, promovida por Turismo de Galicia, pretende acondicionar parte do camiño para facelo máis transitable, xa que hoxe en día ten puntos de difícil paso, especialmente pola acción da auga e da maquinaria pesada.
A delegada territorial da Xunta, Belén do Campo, explicou que as obras no municipio de Dumbría consistirán na reposición das lastras dalgunhas cunetas e na realización de pasos de auga novos onde sexa necesario.
En todo caso, a Xunta respectará "en todo momento" o ancho do camiño e os muros tradicionais. Tamén se procederá á limpeza das zonas transitables e das súas marxes e reporase a capa de rodadura. O proxecto delimita seis tramos de intervención neste concello.
A finalidade desta iniciativa é "potenciar" a Ruta Fisterra-Muxía da Ruta Xacobea. En 2013 fixeron esta ruta preto de 20.000 Persoas e 454 peregrinos realizaron o Camiño dende Fisterra a Santiago.
