El TSXA diz que nun hai nenguna prohibición xudicial a los desenterramientos de Grandas de Salime

Actualizado 13/08/2007 15:21:19 CET

UVIÉU, 13 d'Agostu (EUROPA PRESS)

La Sala de Gobiernu del Tribunal Superior de Xusticia d'Asturies esclarió güei, mediante una nota de prensa recoyida por Europa Press, que "nun hubo nin hai" prohibición xudicial a los llabores de desenterramientu de restos humanos que l'Asociación pa la Recuperación de la Memoria Histórica (ARMH) efectúa nel conceyu de Grandas de Salime. D'esta manera, l'organismu salió al pasu de les diverses informaciones sobre esta supuesta orden xudicial contraria a los llabores de recuperación de los cuerpos.

Según señaló'l TSXA, nel Xulgáu de Primer Instancia y Instrucción de Castropol, nun s'instó formalmente a l'apertura de procedimientu dalgún respecto de los trabayos pa desenterrar los cadabres.

"La xueza únicamente informó de qu'una petición en tal sentíu debía presentase con una relación de los fechos precisos pa examinar la competencia xudicial y adoptar la decisión oportuna", concluyó'l TSXA na citada nota de prensa.

Mientres tanto, l'Asociación pa la Recuperación de la Memoria Histórica continúa el desenterramientu de cadabres de republicanos asesinaos n'A Fonsagrada (Lugo) y enterraos nel conceyu vecín de Grandas de Salime (Asturies).