XIXÓN, 20 de Setiembre (EUROPA PRESS)
El conseyeru d'Industria y Emplegu, Graciano Torre, aseguró güei en Xixón que la situación de Naval Xixón ye de "quiebra", con relación a la insistencia de CCOO pa que se presente un informe qu'avale'l zarru. Torre, quien faló asina tres l'actu de colocación de la primer piedra del nuevu edificiu I+D+I de Duro Felguera en Xixón, indicó que'l Gobiernu del Principáu va siguir asistiendo a la negociación sobre'l futuru de Naval Xixón y ver cómo evolucionar, y adelantó que va aconceyase con Pymar nunes selmanes.
Na so opinión, a quien-y correspuende poner el dineru nesti asuntu ye al Gobiernu central. Sicasí, indicó que'l Prinicpáu tien pendientes avales colos últimos barcos y que too apunta que con ellos va perdese una cuantía importante. Por esti motivu, señaló que'l Gobiernu rexonal ya tien la so "carga económica" como ya la tuvieron estos últimos años.
Respecto a les crítiques de CCOO sobre la refuga de Pymar a presentar un informe de cuentes qu'avale'l zarru del astilleru, el conseyeru dixo desconocer por qué nun entrega eses cuentes, anque nun piensa qu'exista problema en demostrar que Naval Xixón "tien una situación de quiebra". Sicasí, adelantó que va caltener un conceyu con Pymar nos entamos del próximu mes. De fechu, señaló qu'esta mesma mañana tuvo una llamada del director de Pymar y qu'espera poder falar con él.
