Sebastián diz que'l coche eléctricu será buenu pal emplegu en tolos países de la UE

   El ministru d'Industria, Turismu y Comerciu, Miguel Sebastián afirmó esti martes que'l nacimientu n'Europa del vehículu eléctricu supón un "pórque d'ases" que va ser "buenu pal bolsiellu de los ciudadanos, pa la renta y l'emplegu de caún de los países europeos, pa Europa nel so conxuntu y pal planeta polo que representa d'opción medioambiental, amás de la tecnoloxía y la industria".

   En declaraciones a los medios tres tomar parte nes dos primeres sesiones del Conceyu Informal de ministros europeos de Competitividá (Ciencia y Investigación), qu'axunta, dende'l domingu hasta esti martes en San Sebastián, a una decena de ministros de la UE nel marcu de la presidencia española de la Unión, Sebastián afirmó que "nun ye esaxerao afirmar que güei nació'l vehículu eléctricu n'Europa y fízolo baxo presidencia española".

   Nesti sen, señaló qu'esti proyectu ye "esencial" y "tolos europeos tenemos qu'avanzar nél sin dispersión". Amás, destacó l'apoyu d'Alemaña a la "propuesta española d'una estratexa europea" nesta materia, que se llevará al próximu conseyu de ministros de Competitividá que se celebrará en Bruseles.

   Al so xuiciu, güei "ye un buen día pa la industria europea que ta pasando per momentos de dificultá" y añadió que ye en tiempos "difíciles onde hai que facer apuestes de futuru" y "sin duda' coche eléctricu ye una apuesta de futuru porque ye un póquer d'ases", dao que "ye buenu pal bolsiellu de los ciudadanos, va ser buenu pa la renta y l'emplegu de caún de los países europeos, pa Europa nel so conxuntu y pal planeta polo que representa d'opción medioambiental, amás de la tecnolóxica y la industrial".

   Sebastián esplicó que na xornada del martes, centrada nel 'coche verde', tratóse'l desarrollu d'ésti dende un enfoque industrial, al traviés del testimoniu de los fabricantes d'automóviles y componentes y del sector enerxéticu y de les tecnoloxíes de la comunicación, y otru, institucional onde falaron miembros del Parlamentu español, la Comisión Europea y de l'Asociación de Normalización europea, y l'alcalde de Barcelona, Jordi Hereu, como representante de les ciudades europees.