OVIEDO, 15 Jul. (EUROPA PRESS) -
L'Academia de la Llingua Asturiana y la Xunta Pola Defensa de la Llingua tacharon de "insuficiente" y "continuista" l'acuerdu d'invetidura algamáu por PSOE ya IU no que se refiere al tratamientu del asturianu.
La institución, nun 'tuit' señaló que l'acuerdu "ye insuficiente dafechu y nun respuende a les necesidaes y espeutatives sociales. La cooficialidá ye irrenunciable".
Pela so parte, la Xunta emitió una nota prensa na que calificó de "continuistes les referencies a la política llingüística -por llamalo de dalguna manera- que recueyen los medios de comunicación. Y ye que, a la espera de saber si hai dalguna midida concreta, nel alcuerdu namás hai referencies a les discrepancies ente les dos formaciones sobre la oficialidá del asturianu".
"Parez qu'intenten vendenos el desalcuerdu como una midida o que nos demás puntos hubo un consensu xeneralizáu y que namás foi nesa cuestión onde surdieron les rocees. Sobre manera, ye especialmente llamativo qu'una de les fuercies firmantes d'esti alcuerdu asegurara na campaña electoral que la oficialidá yera una prioridá", añadió la nota.
La Xunta consideró qu'IU "nun s'esixó a la FSA un derechu humanu como ye la igualdá de derechos llingüísticos, cuestión que vien xenerando una movilización civil constante dende los tiempos de la Transición y que sigue ensin resolver". "Pa negar la oficialidá agora pónense escuses como la falta de consensu o, mesmamente -utilizando un argumentariu mui de la FSA-, fálase de que los que lo reclama son minoría. Nun vemos mayoríes nin manifestaciones multitudinaries a favor de la reforma de la llei electoral, midida qu'a pesar de la negativa inicial socialista sí s'inclúi nel alcuerdu", añadió.
