Publicado 25/11/2016 20:18CET

Adolfo Camilo gana'l premiu María Josefa Canellada cola novela 'La Mar'

Adolfo Camilo Díaz
BIBLIOASTURIAS

UVIÉU, 25 de Payares (EUROPA PRESS)

L'escritor Adolfo Camilo Díaz resultó ganador de la novena edición del Premiu 'María Josefa Canellada' de Lliteratura Infantil y Xuvenil en llingua asturiana (concedíu pola Conseyería de Cultura) cola novela 'La mar', que trata'l tema de los emigrantes africanos.

A esti gallardón, dotáu con 3.000 euros, podíen presentase obres de lliteratura infantil o xuvenil, con independencia de que se tratara de noveles, compilaciones de cuentos, obres de teatru o poemarios, siempre que los testos fueren inéditos y tuvieren una estensión mínima de doscientos cincuenta versos pa la poesía y de trenta páxines a espaciu doble pa los demás xéneros.

Ente les obres presentaes, el xuráu decidió por mayoría conceder el Premiu al testu La mar, destacando *l'abordaxe d'un tema social d'actualidá, la emigración africana, presentada al traviés del protagonista, un adolescente que narra tal que si fuera un viaxe iniciáticu hacia la mar, real y metafórica*. El testu presentóse col seudónimu Bahir. Abierta la plica, el ganador resultó ser Adolfo Camilo Díaz.

El xuráu encargáu de valorar los trabayos presentaos -formáu polos escritores y especialistes en lliteratura infantil y xuvenil Lourdes Álvarez García, Paz Fonticiella y Vicente Gracía Oliva; l'alcalde de Cabranes, Gerardo Fabián, y Alonso Zamora, fíu de la escritora María Josefa Canellada- axuntó güei na Casa la Cultura de Santoloya (Cabranes) baxo la presidencia del director xeneral de Planificación Llingüística y Normalización, Fernando Padilla Palicio.

Adolfo Camilo Díaz (Caborana, 1963) ye escritor, home de teatru y xestor cultural, y tien ganaos yá dellos de los premios más prestixosos de la lliteratura asturiana, como'l Premiu *Xosefa Xovellanos* de Novela en dos ocasiones, el de novela corta de l'Academia de la Llingua Asturiana o'l Premiu *Montesín* de Lliteratura Xuvenil. Narrador, ensayista y escritor de testos dramáticos, tien publicaes más de venti obres.

Asturianu ofrecido por