UVIÉU, 16 Abr. (EUROPA PRESS) -
El Principáu aprobó'l decretu qu'establez los estatutos nuevos de l'Academia de la Llingua Asturiana (ALLA) y que define con claridá mayor los fines d'esta corporación de derechu públicu y tamién determina cuál ye la so sede social.
La institución celebró'l so 40 aniversariu l'añu pasáu y el Conseyu de Gobiernu d'esti vienres aprobó esta regulación nueva p'afacela a la normativa actual en dellos ámbitos como la tresparencia, la financiación o'l llinguaxe incluyente.
Amás, esclaria'l procedimientu pal nomamientu de los sos miembros de númberu, d'honor y correspondientes, de la que fixa les funciones de los sos órganos: la presidencia, la vicepresidencia la secretaría y la tesorería.
En declaraciones a Europa Press, el presidente de l'Academia de la Llingua Asturiana, Xosé Antón González Riaño, destacó l'aprobación de los estatutos nuevos como "un compromisu del Principáu cola institución y, por eso, cola llingua asturiana". Amás, indicó que suponen "una solución bona dende'l puntu de vista técnicu y xurídicu", pa destacar tamién la collaboración del Executivu pa "modernizar" la institución.
L'Academia de la Llingua Asturiana creóse al traviés d'un decretu del Conseyu Rexonal, l'órganu preautonomicu, pero ensin definir el so estatus xurídicu. depués, el 12 d'abril de 1995, el Conseyu de Gobiernu aprobó los sos estatutos actuales, que se publicaron nel Boletín Oficial del Principáu'l 14 de xunu del mesmu añu.
