UVIÉU, 30 Jun. (EUROPA PRESS) -
El director xeneral de Política Llingüística del Gobiernu asturianu, Antón García, va participar esti xueves a les 17.00 hores nel alcuentru telemáticu del Conseyu de Llingües. Va ser la primer vez qu'Asturies participe nesti órganu del Ministeriu de Política Territorial y Función Pública que vela pol usu de los idiomes del Estáu diferentes del castellanu na alministración pública el Estáu.
Asturies reclamó la inclusión nesti organismu hai un añu, el 2 de xunetu del 2020, nun alcuentru ente Antón García y la subdirectora xeneral de Cooperación Autonómica, Violeta Tomás, y con Ana María de la Fuente, de la Oficina de les Llingües Oficiales del Ministeriu de Política Territorial y Función Pública.
Nel alcuentru, García espunxo los avances realizaos en materia de política llingüística na nuestra comunidá y espresó la necesidá d'incorporar a Asturies a les xuntes del Conseyu de Llingües Cooficiales y a cuantes actividaes promueva esti organismu. Ente otres cuestiones, el director de Política Llingüística fixo especial referencia a la necesidá de que l'alministración central faiga usu de la toponimia oficializada.
Per otru llau, esti mesmu xueves a les 11.00 hores, Antón García va mantener un alcuentru telemáticu col so homólogu gallegu, el secretariu xeneral de la Xunta de Galicia Valentín García Gómez.
