UVIÉU, 13 May. (EUROPA PRESS) -
Asturies solicitó al Ministeriu de Salú "reconsiderar" el repartu d'Astrazeneca ente autonomíes pa que los territorios con más población avieyada puedan entainar el procesu de vacunación énte otres rexones con poca población d'esa franxa d'edá.
Asina lo señaló'l conseyeru de Salú asturianu, Pablo Fernández Muñiz, en participando esti miércoles nel Conseyu Interterritorial de Salú. Según el conseyeru, delles autonomíes destacaron que tán teniendo problemes d'estocaxe porque tienen poca población mayor de 60 años y les vacunes d'Astrazeneca queden guardaes ensin poder alministrales.
"N'Asturies pasa tolo contrario, la nuestra población ye mayor y tovía tenemos munches persones candidates a la vacuna d'Astrazeneca nesi rangu d'edá, tanto pa primer dosis como pa la segunda. Por eso, solicitemos reconsiderar la so distribución pa evitar estos problemes d'estocaxe y permitir vacunes a estes persones mayores de 60 años en cuenta de teneles na nevera", indicó'l conseyeru.
Muñiz esplicó que n'Asturies yá s'alministraron más de 600.000 dosis de vacunes a 400.000 persones. "Más de 300.000 persones son mayores de 60 años, lo que supón que yá tán más del 90% d'esa edá vacunaos", esplicó'l conseyeru, qu'indicó qu'esperen qu'a finales de xunu tea llistu'l certificáu covid européu dixital.
