UVIÉU, 16 Nov. (EUROPA PRESS) -
Un total de 120 militares y más 40 vehículos van treslladase la selmana próxima a Asturies pa realizar el simulacru d'una catástrofe d'orixe natural nel que se va asemeyar un seísmu grande con dos répliques, producíu al norte de la ciudá d'Uviéu y que va xenerar el frayamientu de la presa de San Andrés de los Tacones.
El Batallón de Tresmisiones de la UME (Btume) va realizar ente los díes 19 y el 23 esti exerciciu de telecomunicaciones que va suponer, sobre'l papel, l'activación en nivel 3, emerxencia de calter nacional, de dos planes: el Plan de Llenes del Principáu d'Asturies (PLANINPA) y del Plan d'Emerxencia Esterior (PLAQUIMPA) de la Central Térmica d'Aboño en Xixón.
El supuestu que se plantea ye una catástrofe d'orixe natural pol frayamientu de la presa de San Andrés de los Tacones depués d'un terremotu. La situación va causar dellos daños de gravedá obligando al Principáu d'Asturies a activar estos dos planes.
El frayamientu de la presa va cortar l'A-8, enllenando d'agua polígonos industriales y empreses asitiaes a lo llargo del ríu Aboño y afectando a ArcelorMittal y les llinies de tren. Na Central Térmica d'Aboño va haber escapes, quemes y daños personales hasta esi momentu desconocíos. Per otru llau, n'ArcelorMittal hai una esplosión y escapes de gas que sumen más finaos y desaparecíos.
Un fallu en Quimastur xenera una fuga nes esferes de contención col riegu d'una nube altamente tóxica, mentes qu'un accidente nun vehículu de material radiolóxicu y el colapsu d'una parte del llaboratoriu d'Asturlab empeoren la situación. Hai decenes de desaparecíos y una riestra de mancaos.
Este ye'l cronograma de los fechos del simulacru, realizáu pa comprobar y perfeccionar la coordinación ente los organismos implicaos pa tar preparaos pa encarar, si fora necesario, con eficacia una emerxencia d'esti tipu.
El BTUME va mover a les instalaciones del SEPA (Serviciu d'Emerxencies del Principáu d'Asturies), en Llamorgal, Llanera cerca de 120 militares y más de 40 vehículos. Los medios van ser los mesmos que s'esplegaríen pa materializar el Puestu de Mandu Desplegable del Cuartel Xeneral de la UME que se pondría, al tratase d'una emerxencia de nivel 3, al mandu de la mesma. Los efectivos van empezar a llegar, esti sábadu día 17 y l'exerciciu principal va ser el xueves día 22 próximu.
Pol SEPA van movilizase una trentena de profesionales ente Técnicos de Telecomunicaciones, de Protección Civil, de Coordinación y mandos y de Bomberos d'Asturies.
