UVIÉU, 4 Abr. (EUROPA PRESS) -
La Estaya de la Llingua del Conceyu d'Avilés programó un ciclu d'actividaes entituláu 'La reciella en casa: La cuarentena presta', pal públicu infantil que se va desenvolver ente los díes 6 y 13 d'abril, coincidiendo coles vacaciones de Selmana Santa.
Van ser un total de 8 actividaes en llingua asturiana al traviés d'internet con disciplines como los cuentacuentos, la música o los talleres de temátiques tan variaes como la escritura, el dibuxu, el cómic o la ropa tradicional.
Tolos díes, dende les 12.00 hores y durante les 24 hores siguientes, va ser posible participar nestes actividaes dende enllaces publicaos na web de la Estaya de la llingua (www.llinguaviles.com) y del Conceyu d'Avilés (www.aviles.es), amás d'en redes sociales municipales.
