UVIÉU, 25 May. (EUROPA PRESS) -
El presidente del Principáu, el socialista Adrián Barbón, destacó que'l 25 de mayu ye una fecha que merez "conocencia y reconocencia" y, "ensin competir col 8 de setiembre", quede fixada na memoria colectiva de la sociedá asturiana.
"Toi convencíu de que col pasu de los años tal día como güei les banderes d'Asturies van acabar enllenando los balcones nuna fiesta colectiva", destacó'l presidente nel so discursu nel actu institucional pa conmemorar el 25 de mayu, fecha na que, en 1808, la Xunta Xeneral del Principáu proclamó la so soberanía énte l'invasor francés, al que declaro la guerra.
D'esta xornada tamién vien la bandera d'Asturies, cuando l'exércitu asturianu empezó a usala como estandarte según l'informe qu'ellaborara Xovellanos y que proponía que los nobles de la rexón la usaran atendiendo al utilizáu polos reis asturianos.
Por eso, Barbón reivindicó nel so discursu --realizáu en castellanu, asturianu y gallego-asturianu-- la "conocencia y reconocencia" de la fecha "ensin patrimonializar nada" como pasa cola bandera, "símbolu que salta perriba de sigles y d'ideoloxíes, que nun compite con identificaciones relixoses nin culturales".
"Na nuestra España, onde los independentistes bucíen de siguío pa topar dalgún cachín al que venceyar el so rellatu nacional, qué comunidá nun se sentiría arguyosa de ser la primera en declarar la guerra al invasor", preguntóse'l presidente, que tuvo palabres pa facer un paralelismu con 1808 y la situación que vive güei Ucraína pol so "refugu heroicu a doblegase pa salvar la so patria, la so llibertá y los sos derechos énte un adversariu que multiplica la so fuercia militar".
Coles mesmes, indicó que dende'l Principáu esperen qu'esta conmemoración "cale" y tamién valga "hacia'l futuru", ensin significar qu'esto suponga "poner un día más en colloráu nel calendariu nin competir col 8 de setiembre". "Que nun s'abaruye con sesgos ideolóxicos nin otres males interpretaciones", señaló.
Al actu celebráu nel Palaciu Conde de Toreno --espaciu onde nació José María Queipo de Llano, ún de los políticos protagonistes de 1808-- asistieron la delegada del Gobiernu Delia Losa; el presidente de la Xunta Xeneral, Marcelino Marcos; el rector de la Universidá d'Uviéu, Ignacio Villaverde; dellos conseyeros; representantes de diverses instituciones; y de tolos grupos parllamentarios; amás de representantes sindicales y de la patronal.
REXONALISMU/NACIONALISMU
Per otru llau, el presidente de la Xunta, Marcelino Marcos, resaltó la importancia de conocer la historia d'Asturies "ensin tener como falsos guíes los estereotipos y clixés al usu" y destacó como la fecha marcó "un sentimientu d'autoconciencia diferencial: el rexonalismu asturianu".
Con too, quixo dexar claro que rexonalismu nun ye nacionalismu y que "la singularidá y la diferencia" nun tienen que conducir "a posiciones de privilexu" nin a "una estratificación socioeconómica".
Asina, alvirtió del "peligru potencial" de "esa especie de neocantonalismu que ta surdiendo como una consecuencia d'esa estratificación socioeconómica nacionalista dientro de la nuestra comunidá autónoma".
Marcos cargó contra les propuestes que van en contra del equilibriu territorial y la solidaridá, pero tamién de los discursos "centralizadores" y defendió l'Estáu de les Autonomíes que "fortaleció'l grau necesariu de cohesión social y política de los asturianos dientro d'un Estáu Constitucional".
Per otru llau, el segundu teniente d'alcalde d'Uviéu, Mario Arias, llamó a sentir arguyu del 25 de mayu y defendió el patriotismu como "mecanismu d'unión y non de división" nun momentu en que se ta poniendo en riesgu la convivencia de too un país".
Asina, defendió l'autogobiernu y la bandera d'Asturies, pero siempre, eso sí, dientro de "la unidá de la nación", de la que reivindicó'l papel de la Corona dientro de la España constitucional y quixo dexar claro que la declaración de soberanía de la Xunta Xeneral de 1808 "nun punxo en cuestión la unidá d'España".
P'acabar, llamó a qu'Asturies "trabaye xunida" ensin "gastar la enerxía en temes menores" y recordó la situación d'Ucraína. "El valor d'aquellos asturianos de 1808 ye la llucha de güei de los ucrainos", señaló.
