UVIÉU, 18 Oct. (EUROPA PRESS) -
El presidende del Principáu, el socialista Adrián Barbón, punxo esti vienres al Principáu d'Asturies como exemplu de "paz, convivencia y futuru" y reivindicó el papel de la rexón, la so posición nel mapa y la importancia de sacar la voz de les fronteres naturales y dicir que "Asturies ye una tierra con fame de futuru, que nun se da por vencida y qu'énte los problemes medra con una identidá xenerosa que-y dexa reivindicar proyectos comunes como ye España".
Adrián Barbón destacó la importancia d'esta xornada d'entrega de los Premios Princesa d'Asturies 2019 pal Principáu, nun día "de contrastes", porque recordó que "nel Estáu español hai güei dos visiones o mensaxes distintos".
Asina indicó que "per un llau ta la situación de Cataluña con esos mensaxes y grupos más estremistes y radicales que tán intentando romper la convivencia y qu'esmolez a toos". Pero per otru llau ta Asturies "con un mensaxe de paz, de convivencia, de llibertá y sobremanera de puesta en valir de la cultura, de la tradición, de la investigación científica y tecnolóxica y sobremanera del futuru".
Barbón facía estes declaraciones a los medios nel hall del Hotel de La Reconquista d'Uviéu, enantes de participar nes tradicionales audiencies colos Reis, nes que tamién van tar presentes la princesa Leonor y la infanta Sofía.
Adrián Barbón repitió que los Premios Princesa d'Asturies son ensin dulda el meyor escaparate de la nuestra tierra y faen qu'Asturies trespase fronteres internacionales y ponnos nel mapa destacó qu'esti ye un añu bien especial cola presencia de la Princesa Leonor y la so primer intervención pública.
"Ye un día mui importante pa la historia de los premios pero tamién p'Asturies, pa poder dende equí mandar un mensaxe mui importante", indicó Barbón.
