UVIÉU, 9 Oct. (EUROPA PRESS) -
El presidente del Principáu, Adrián Barbón, retrucó esti miércoles a la portavoz del grupu parllamentariu de Ciudadanos, Laura Pérez Macho, que "la clave de la paralización asturiana ye que n'España vamos a elecciones nueves el 10 de payares por culpa del so partíu".
Barbón respondía asina a la portavoz de Ciudadanos, que nel primer turnu d'entrugues al presidente en sede parllamentaria d'esta llexislatura planteó "cómo afectó'l retrasu na puesta en marcha de la estructura nueva del Executivu socialista a la operatividá y eficacia de l'actividá de l'Alministración pública asturiana".
Barbón criticó que la portavoz de la formación naranxa nun preguntara pola acción del Gobiernu y encamentóla a qu'utilice'l so tiempu d'entrugues neso.
"Nós lo que tenemos claro ye que pensando nos intereses d'Asturies pidímos-yos que desbloquiaren la situación y ustedes creen que la política ye una especie de veleta. Aproveche'l turnu d'entrugues pa falar de l'acción del Gobiernu" encamentó-y Barbón.
El presidente asturianu recordó que nun-y correspuende al Gobiernu fixar les feches de los plenos y indicó que'l periodu mediu de formación del Gobiernu ta ente once y doce selmanes y nesti casu xubió namás a catorce, "dos selmanes perriba".
Nesti sentíu incidió en que se tomaron el tiempu necesario porque había que modificar una estructura "teniendo en cuenta les prioridaes d'Asturies". Una d'elles la cultura xunida al turismu y otra la ciencia, investigación y Universidá. "Eso nun ye perder el tiempu y ye necesario escoyer los perfiles afayadizos", indicó.
Per otru llau, Pérez Macho manifestó que'l primer plenu siempre se celebró ente'l 22 y 25 de setiembre, y criticó que considere anecdótico "que puedan ser 15 díes más o menos, igual d'anecdóticu que la estructura cueste un millón más o menos".
Asina, a xuiciu de la formación naranxa Adrián Barbón "lleva trés meses celebrando la so victoria electoral", con semeyes en celebraciones y actos y hasta cuatro inauguraciones del cursu escolar. Tamién criticó que "quixeren mercar a IX y Foru", partíos cola metá de votos de Ciudadanos, que cuenten con grupu propiu.
Pérez Macho acusó al presidente del Principáu d'instaurar el "barboncentrismu' y el 'cofiñocentrismu' nesta etapa nueva de Gobiernu y pidió-y al presidente que "sía humilde".
