Candamu entama unes xornaes sobre'l vinu

Actualizado 01/03/2018 10:41:10 CET

UVIÉU, 1 Mar. (EUROPA PRESS) -

El Serviciu de Normalización Llingüística de Candamu organiza les xornaes 'Cultura alredor del vinu' en Cueru. Va ser el vienres 16 de marzu y n'elles va tratase'l tema del vinu como ún de los atractivos culturales y sociales del conceyu.

La xornada va principiar a las 19.30 hores nel Centru Social de Cueru, onde va haber una mesa redonda con títulu 'El vinu de Candamu ya la redolada', onde van participar espertos na materia como Loli Loureiro, doctora en Ciencias Biolóxiques y investigadora responsable del Plan Esperimental pal Desarrollu de la Vitivinicultura n'Asturies, Javier Fernández Conde, catedráticu d'Historia Medieval, Manuel Ángel López, responsable de Viveros Candamo y espertu nel desarrollu vitivinícola actual de Candamu, y Beatriz Pérez, presidenta de la DOP de Cangas del Narcea y responsable de la Bodega Vidas.

Nesta mesa redonda va falase de las esperiencia n'otros sitios d'Asturies respecto al vinu, va esplicase la tradición vinera del conceyu de Candamu y va cuntase cómo se ta trabayando actualmente la recuperación de les cepes.

Esa mesma tarde, depués d'acabar la mesa redonda, va haber un conciertu del grupu Tuenda nel Chigre Ca Libertá, tamién en Cueru, a las 21.30 de nueche.

Tanto l'actu nel Centru Social como'l conciertu de Tuenda van ser de baldre y va poder asistir tola xente que quiera. Esti eventu forma parte de las actividades que se tán faciendo dende'l Serviciu de Normalización Llingüística de Candamu pa promocionar la llingua asturiana como bien d'interés común del conceyu y como dinamizador de la zona rural, pues la llingua y el desarrollu social puen dir de la mano y el factor llingüísticu pue mover la economía d'una zona.