L'alcalde reclama un "tratamientu distintu" al de Xixón porque la situación ye distinta
UVIÉU, 5 Nov. (EUROPA PRESS) -
L'alcalde d'Uviéu, Alfredo Canteli (PP), refugó esti xueves que s'aplique'l confinamientu domiciliariu y pidió al Gobiernu autonómicu que dexe l'apertura del pequeñu comerciu.
Nunes declaraciones a los medios na presentación en Trescorrales del cartelu de la película 'Tristesse', Canteli aseguró que los comerciantes y hosteleros "se portaron bien" nel andanciu anque hubiera "esceiciones". "Nada ye por casualidá, pues tener más o menos suerte, pero dalgo fixo bien", dixo, p'afirmar depués que nun apoya "n'absolutu" el confinamientu. "Hai que ser responsables pero hai que salir a la cai y pasiar", dixo.
L'alcalde reconoció "pasalo mal" nes xuntes que caltuvo esti miércoles y güei con hosteleros y empresarios locales. "Ver a la xente llorando ye duro", esplicó, p'añadir que lo que más esmolez al sector del pequeñuu comerciu afectáu poles restricciones de Salú nun son estos quince díes de zarru, sinón que vaigaa a más y s'allargue nel tiempu.
Ye por eso que pidió al conseyeru d'Industria, Enrique Fernández, que pueda abrir el pequeñu comerciu pa que "puedan vender". "Esmolezme muncho, muncho, la sanidá, pero tamién la economía y l'empléu", indicó.
Nesti puntu destacó qu'Uviéu ta "muncho meyor" qu'otres grandes ciudaes d'Asturies como Xixón. "La situación ye distinta y el tratamientu tien que selo", dixo, pa preguntase si la situación de Xixón fuera la d'Uviéu y la capital tuviera rexistrando los datos de Xixón, zarraríen Xixón. "Ehí queda", dixo.