Casado acusa a la esquierda d'utilizar a la llingua asturiana como un "preséu" pa "dixebrar" a la sociedá

El presidente del PP, Pablo Casado
DAMIÁN ARIENZA / EUROPA PRESS
Publicado 11/01/2019 15:11:28CET

UVIÉU, 11 Ene. (EUROPA PRESS) -

El presidente del PP, Pablo Casado, refugó esti miércoles la idea de que pueda "imponese por decretu una oficialidá del asturianu que naide reclama". Nel actu de presentación de los candidatos n'Asturies, Casado acusó a la esquierda d'utilizar a la llingua asturiana como un "preséu" pa "dixebrar" a la sociedá.

"Claro que'l PP ta a favor del patrimoniu cultural asturianu y tamién del llingüísticu, pero nun pue imponese la cooficialidá", dixo. Casado afirmó qu'él respeta l'asturianu, lo mesmo que fai con toles llingües d'España. "Pero la llingua n'España ye'l español, el castellanu", dixo.

Casado pronuncióse nestos términos nun escenariu habilitáu nun hotel uvieín con un fondu nel que podía apreciase el paisaxe de los Picos d'Europa dende'l Mirador d'El Fitu. Pal líder del PP, les tradiciones han de caltenese, pero nun imponese. "La llingua siempre foi un preséu políticu de fragmentación pa la esquierda", llamentó.

El líder 'popular' nun dexó pasar la oportunidá de recurrir al dichu de que 'Asturies ye España y lo demás ye tierra conquistao' y refirióse a la llegada del so partíu a la Junta d'Andalucía. "Esta vez La Reconquista va ser al aviesu, va principiar per Andalucía y va terminar per Asturies", afirmó.

Casado comprometióse a baxar los impuestos a los asturianos y a desaniciar los de Patrimoniu, Sucesiones y Donaciones. Llamentó que'l Gobiernu del socialista Pedro Sánchez pretenda encarar el procesu de descarbonización con unos plazos mesmo más aceleraos que los qu'esixe Europa, perxudicando a Asturies.

Tamién reclamó meyores comunicaciones y infraestructures pal Principáu. Esixó que se cumpla "lo prometío" en relación a la variante ferroviaria de Payares. "Asturies tien que tener un tren d'alta velodidad; taba alcordao y presupuestao", sorrayó.

De "desgarrador" calificó'l "éxodu masivu" de mozos asturianos y llamentó los problemes de les industries electrointensives, que traen situaciones como'l pieslle d'Alcoa, con factoría n'Avilés. El "esbarrumbe" de la industria del motor, alvirtió Casado, tamién pue afectar a les plantes asturianes d'ArcelorMittal. Nesti sentíu, criticó a la ministra pa la Transición Ecolóxica, a la qu'acusó de 'demonizar' el diésel.

Contador