ALMERÍA/UVIÉU, 13 Nov. (EUROPA PRESS) -
El presidente del PP, Pablo Casado, criticó esti martes el tratu que quier dar el PSOE a les llingües cooficiales que, según dixo, "usáronse contra los neños pa dixebrar" y censuró que los socialistes pretendan oficializar "el bable que nun fala naide" n'Asturies
Asina, posicionóse en contra de la propuesta de reconocer el vascu en La Rioxa. "¿Qué va ser lo próximo? ¿Que nos faigan falar valencianu n'Almería por eso de la cercanía xeográfica? Sería lo mesmo, un esparate", dixo na so intervención nun almuerzu informativu entamáu por Nueva Economía Forum y que se celebró n'Almería.
Casado, qu'acompañó al líder del PP-A y candidatu a la Presidencia de la Junta de Andalucía, Juanma Moreno, censuró que'l PSOE quiera oficializar "el bable que nun fala naide" n'Asturies, el catalán n'Aragón, la inmersión llingüística en Valencia y Baleares o que "Navarra sía euskaldun dafechu, asumiendo hasta los sos símbolos".
"Pregunto si a la presidenta andaluza y secretaria xeneral del PSOE-A, Susana Díaz, parécen-y bien estes imposiciones y prestaríame que me contestara", dixo pa repitir que se trata de "un disparate".
Nesta llinia, Casado espresó la so "esmolición grande" énte la reforma educativa que propón el Gobiernu de Pedro Sánchez y que calificó de "mui mala pa los nuestros neños" frente a la llei actual promovida pol PP "que baxó la tasa d'abandonu escolar un seis por cientu, que prestixó la FP Dual como n'Alemaña o consagró la llibertá d'elección de los padres".
"¿Por qué me va a dicir a mi un políticu a qué colexu tengo que llevar a los mios fíos? Voi llevalos al qu'a min me dea la gana que pa eso pagu impuestos", espetó.
El presidente del PP criticó que la propuesta del ministeriu que dirixe Isabel Celaá "cargárase" les evaluaciones pa "controlar" el sistema educativu con "responsabilidá" y alvirtió de que va en "dirección contraria" a lo que demanda'l mercáu llaboral.
"Son noticies mui males, por nun falar del tratu a les llingües cooficiales cuando se vio como en Valencia, Cataluña y Baleares usáronlo contra los neños pa dixebrar cuando l'idioma tien que ser una riqueza", dixo p'acabar.
