Actualizado 27/04/2018 15:35 CET

CCOO denuncia'l "parón" na introducción del asturianu n'Infantil "como establez la Llei y anunció la Conseyería"

Genaro Alonso en la inauguración del curso en el colegio Carmen Ruiz Tilve
PRINCIPADO - Archivo

UVIÉU, 27 Abr. (EUROPA PRESS) -

La secretaría de Llingua Asturiana y Gallego-asturiano del Sindicatu d'Enseñanza de CCOO Asturies, Marta Mori, denunció'l "parón" nel procesu d'introducción del asturianu n'Educación Infantil, dalgo que, según el sindicatu, establez la Llei d'Usu del Asturianu de 1998 y anunció la Conseyería d'Educación y Cultura.

Al traviés d'una nota de prensa, CCOO recordó que dende'l Gobiernu asturianu anunciaron la so intención de camudar el Decretu de currículu del segundu ciclu d'Educación Infantil, "iguando los procedimientos necesarios pa que los especialistes d'Educación Primaria pudieran dar clase de Llingua tamién nesa etapa".

Asina, espliquen qu'en payares del 2017 fíxose pública una propuesta de camudamientu curricular que prevía l'inxertu de conteníos d'asturianu, que l'alumnáu podría cursar de forma voluntaria, nel área de Llinguaxes: Comunicación y Representación.

Amás, indiquen que nun conceyu ente'l sindicatu y el director xeneral de Planificación Llingüística y Normalización del Gobiernu asturianu, Fernando Padilla, ésti espresó la so intención d'inxertar l'aprendizaxe de conteníos d'asturianu nes propuestes curriculares d'Educación Infantil "de forma progresiva" a partir del cursu 2018/2019.

Los oxetivos inmediatos yeren regularizar la situación de los centros educativos onde se tán impartiendo estos
conteníos de forma esperimental ampliando, al mesmu tiempu, la ufierta a centros nuevos.

"Esta propuesta inda nun se promulgó nel BOPA, a pesar de que'l plazu de prematrícula nos centros educativos yá empezó, polo qu'hai que suponer que nun se va executar como taba anunciao", denunció'l sindicatu, qu'afirmó que la situación "ta causando gran decepción ente'l profesoráu de Llingua Asturiana, na midida en que nun se cumplen les expectatives creaes pola propia Conseyería".

Pa CCOO, la esclusión de la enseñanza del asturianu na Educación Infantil constituye "un incumplimientu de la Llei d'Usu y Promoción del asturianu, que determina que'l Principáu d'Asturies ha asegurar l'enseñu d'esta llingua en tola enseñanza reglada.

"Pa CCOO, la única actuación llexítima en rellación con esti asuntu ye xeneralizar la ufierta voluntaria de conteníos d'asturianu y gallego-asturianu nel segundu ciclu d'Educación Infantil", sentencien.

Asturianu ofrecido por