Publicado 13/10/2017 14:54CET

Los Centenarios de Cuadonga van incluir dos xornaes sobre l'orixe del nuestru idioma

Presentación actos conmemorativos Covadonga 2018
EUROPA PRESS

UVIÉU, 13 Oct. (EUROPA PRESS) -

Más de 80 actos llitúrxicos, culturales, deportivos y institucionales van conmemorar a lo llargo de 2018 el Centenariu de la Coronación de la Virxe de Cuadonga, los 1.300 años de los oríxenes del Reinu d'Asturies, y el centenariu de la creación del Parque Nacional del Monte de Cuadonga, trés acontecimientos que Principáu, Diócesis d'Uviéu y Conceyu de Cangues d'Onís xuntaron baxu'l lema 'Centenarios de Cuadonga 2018'. Ente tolos actos, destaquen dos xornaes centraes nel orixe de la llingua asturiana.

Un grupu de trabayu formáu por representantes de les trés instituciones tuvo entamando dende abril el gruesu de los actos que van celebrase a lo llargo del añu próximu, dixebraos en cinco bloques temáticos. Eventos de calter cultural, xornaes y celebraciones llitúrxiques, acontecimientos deportivos, actos institucionales y promoción turística.

El conseyeru de Presidencia y Participación Ciudadana, Guillermo Martínez, presentó en rueda de prensa les actividaes, acompañáu del alcalde de Cangues d'Onís, José Manuel González; el vicariu xeneral de la Diócesis d'Uviéu, Jorge Juan Fernández Sangrador; l'Abá de Cuadonga, Adolfo Martiño; y la Directora Xeneral de Patrimoniu Cultural, Otilia Requejo.

Los eventos van tener llugar nel Real Sitiu de Cuadonga, amás de nos distintos conceyos del Parque Nacional de Picos d'Europa, especialmente en Cangues d'Onís. Tamién va haber actividaes n'Uviéu y Xixón pa conmemorar trés eventos "d'escepcional interés públicu".

Ente les distintes actividaes destaquen la esposición fotográfica itinerante 'Ayer y hoy de los Picos de Europa', o la celebración d'un ciclu de conciertos sinfónicos conmemorativos del Parque Nacional del Monte, cola participación de la Orquesta Sinfónica del Principáu d'Asturies (OSPA), el coru de la Fundación Princesa d'Asturies y l'Escolanía de Cuadonga.

Sobre la parte llitúrxica, los actos conmemorativos empezaron el p 8 de setiembre pasáu cola apertura del Añu Xubilar, y va siguir con alcuentros de relixosos y misioneros, una xornada rexonal de la mocedá y xornaes de la Sociedá Española de Marioloxía.

El tercer exe del programa suma trece acontecimientos deportivos, como la vuelta a Picos d'Europa en moto y carreres de monte. L'área institucional toma la presentación d'un sellu conmemorativu de la declaración del Parque Nacional de Cuadonga y tien como epicentru'l Día d'Asturies de 2018. Esi día llantarán un árbol nel xardín del Príncipe como hai un sieglu fixo Alfonso XIII mentes la so visita al Real Sitiu, y va inaugurase el Mirador de la Princesa.

Sobro esti últimu aspectu, el vicariu xeneral d'Uviéu, afirmó que la Casa Real "ye conocedora" de que 2018 "va ser un añu especialmente significativu p'Asturies, España y Iberoamérica", y afirmó que "el pueblu sentiríase honráu" de contar cola presencia de los monarques na celebración d'estos actos.

La promoción turística, pela so parte, englobará una serie d'actuaciones enmarcaes nuna campaña específica de turismu relixosu. El logotipu conmemorativo va enllantar na gráfica del proyectu 'Vuelve al Paraísu' y Cuadonga va tar presente en Fitur. A ello sumaránse distintes campañes publicitaries n'autobuses, redes sociales, mupis y una páxina web específica que va entrar en funcionamientu en xineru.

Per otru llau, dientro de les once xornaes que se van facer, destaca una entamada pola Academia de la Llingua Asturiana sobre los primeros testos n'asturianu y el nacimientu del nuestru idioma nel contestu del Reinu d'Asturies. Otra manera, la Dirección Xenerald e Planificación Llingüística va encargase d'otra xornada sobre l'orixe del nuestru idioma.

Amás, va reeditase'l llibru de poesia n'asturianu del concursu sobre Cuadonga que se fixo nel Teatru Campoamor en 1960. Una muestra de folclore y un festival de bandes de gaites van ser les otres cites de marcáu tastu astur.