UVIÉU, 19 Feb. (EUROPA PRESS) -
Cinco persones resultaron mancaes de diversa consideración, cuatro con pronósticu leve y una con pronósticu reserváu, nun accidente de tráficu nel que tuvieron implicaos dos turismos nel cruce de l'AS-112, en Santa Cruz, Mieres, según informó'l Serviciu d'Emerxencies del Principáu d'Asturies (SEPA).
Según los datos facilitaos pol Serviciu d'Atención Médica Urxente (SAMU) los cinco mancaos treslladáronlos al Hospital Álvarez Buylla. La de mayor consideración ye una muyer, de 36 años d'edá, que presenta, a falta de más pruebes y hasta valoración médica nueva, politrauma de pronósticu reserváu. Foi atendida y evacuada pol equipu médicu de la UVI-móvil mierense.
A l'afectada que viaxaba como acompañante nel asientu delanteru del vehículu, evacuáronla del so interior pol efectivos de Bomberos del SEPA con base nel parque mierense. La muyer escarceláronla y inmovilizáronla con collarín, con ayuda de la tabla de rescate.
Nesti mesmu vehículu viaxaba un varón de 35 años d'edá y una menor de dos años. A dambos los evacuaron con pronósticu leve, al mesmu centru hospitalariu. Foron atendíos nel llugar pol equipu d'Atención Primaria de Figareo y treslladaos na ambulancia de soporte vital básicu de Mieres.
A los otros dos mancaos de calter leve, dos varones de 54 y 34 años d'edá que viaxaben nel otru coche implicáu nel accidente, treslladáronlos tamién al hospital mierense na ambulancia de soporte vital básicu de L.lena.
El Centru de Coordinación d'Emerxencies del 112 Asturies recibió l'avisu a les 09.03 hores. Na llamada informaben del choque de dos turismos con delles persones mancaes y un atrapáu.
