Actualizado 08/03/2017 14:55 CET

David Rivas estima que la oficialidá costaría unos ocho millones añales, el 0,25% del presupuestu autonómicu

UVIÉU, 8 de Marzu (EUROPA PRESS)

El profesor d'Economía de la Universidá Complutense David Rivas estimó esti miércoles "nun aproximamientu" el costu que traería l'aplicación de la oficialidá del asturianu nunos 8 o 10 millones d'euros, una cifra que nun llegaría al 0,25% del presupuestu autonómicu aprobáu pal 2017, según matizó.

Rivas foi unu de los comparecientes na Comisión d'Estudiu del Réxime de Protección de la Llingua Asturiana, celebrada esti miércoles na Xunta Xeneral. Na so opinión, la declaración de la oficialidá "nun ye que nun seya cara, ye que ye tirada".

El profesor presentó "una aproximación", dao que, matizó, "nun existen estudios al respective", motivu pol que pidió que se desarrolle un trabayu más detalláu. Esplicó que tomó como referencia l'exemplu de Galicia, una comunidá con unes circunstancies asemeyaes a les d'Asturies. "Cada llingua requier un tipu d'oficialidá y la nuesa paezse a la gallega", señaló.

Los costos calculólos en dos ámbitos, el "educativu y el social institucional". Sobre l'educativu, el cálculu sería que costaría en sobre 20 millones d'euros al añu, que s'amenorgaríen a 15 millones optimizando recursos humanos. Sobre los seis millones d'euros sería'l gastu nel ámbitu institucional y social.

Nestos momentos, señaló, Asturies yá presupuesta unos cinco millones al añu, lo cual colleva que'l costu adicional d'asumir la oficialidá sería de 16 millones, "un 0,4% del presupuestu actual. De cada 100 euros presupuestaos, unos 40 céntimos diben ser pal asturianu".

Sicasí, matizó que'l costu nun lo pagaría dafechu'l gobiernu asturianu porque habría que pactar cola Alministración central el coeficiente de pluralidá llingüística, que nel casu d'Asturies estimó nunos 8 millones. "Poro taríamos nuna forqueta de costu d'ente 8 o 10 millones d'euros, un 0,25% del presupuestu". "La oficialidá nun ye cara, y habría en facer un estudiu sobre los beneficios y recursos que nos reportaría", añadió.

Otru de los comparecientes foi'l periodista Próspero Morán, quien considera que "la normalidá (no referente a la 'llingua') empezó a consolidase na Universidá". Señaló como exemplos, les intervenciones n'asturianu del actual rector, Santiago García Granda, n'actos como la toma del cargu. Tamién emponderó "los xestos" del anterior nel cargu, Vicente Gotor, que lleyó dellos discursos ya intervenciones nesta llingua.

Sicasí, mostróse críticu col usu de la 'llingua' nos medios de comunicación, especialmente no referente a la TPA, que-y apurre unos minutos "d'humor zafiu, aldeanu y ridiculizante", utilizando un asturianu diglósicu en programes sobre pueblos y mercaos que recuerden a "los tiempos de los nuesos güelos y güeles".

Asina, consideró que "cualquier acción destinada a protexer al asturianu pasa pela Universidá y los medios de comunicación de mases", alvirtió'l periodista.