UVIÉU, 9 Oct. (EUROPA PRESS) -
Dalgo más d'un cientu de persones concentráronse esti miércoles énte la Catedral d'Uviéu n'apoyu a los trés trabayadores de Vesuvius enzarraos nel templu de la capital asturiana pa pidir una solución al conflictu y la retirada del ERE.
La concentración empezó a les 19.30 hores, poques hores depués de que los trabayadores aportaren a la Catedral y decidieren empezar un enzarru indefiníu na sacristía pa esixir la retirada del espediente de regulación d'empléu (ERE) qu'afecta a les plantes de Llangréu (Asturies) y Miranda del Ebro (Burgos).
A les 20.00 hores, el presidente del Comité d'Empresa, Juan Manuel Baragaño, lleyó un comunicáu énte les persones aconceyaes xunto la Catedral --que los trés trabayadores pudieron escuchar dende dientro vía telefónica-- y onde s'acusó a la empresa de "burllase" de trabayadores, alministraciones y ciudadanía.
Coles mesmes, pidieron a la sociedá asturiana "aparar los pies" a la pretensión de la empresa "de dexar a 128 families na cai pa siguir aumentando los sos beneficios". Tamién realizaron un llamamientu a toles alministraciones y axentes sociales "pa qu'intervengan con toles armes de la llei".
La concentración acabó con cantaraes de 'Asturies ponte en pie', 'Vesuvius nun pieslla' o 'Que viva la llucha de la clase obrera'.
La empresa Vesuvius rexistró'l 12 de setiembre l'ERE, que va executase esti llunes 14 d'ochobre si nada cambia nel periodu de trámite de consultes.
La compañía fala de razones organizativas pa dexar de producir nos centros mentaos. Sicasí, los trabayadores opónense alegando que la compañía tien beneficios, dicen que se trata d'una deslocalización y esixen la retirada del ERE.
